হাতত টেটুৰে স্বাধীনতা সংগ্ৰামীৰ ছবি আঁকি অভিলেখ

দহগৰাকী স্বাধীনতা সংগ্ৰামীৰ ছবি অংকনেৰে ইণ্ডিয়া বুক অৱ ৰেকৰ্ডছত অন্তৰ্ভুক্ত ।

যোৰহাট: আজিকালি টেটু কৰাটো ফেশ্বনত পৰিণত হৈছে ৷ ইয়াৰ জৰিয়তে মানুহে নিজৰ পছন্দৰ ডিজাইন ছালত ছাপ দি ব্যক্তিত্ব প্ৰকাশ কৰে ৷ এই টেটুকেই একাংশ লোকে আকৌ বিভিন্ন মাধ্য়মেৰে প্ৰকাশ কৰি গঢ়িছে অভিলেখ । কোনোবাই যদি অতি ক্ষুদ্ৰ অংকনেৰে অভিলেখ প্ৰতিষ্ঠা কৰিছে, আন একাংশই আকৌ এনে গৌৰৱৰ অধিকাৰী হৈছে স্বাধীনতা সংগ্ৰামীৰ ছবি আঁকি । যোৰহাটৰ যুৱক এজনেও গঢ়িলে এই অভিলেখ ।

নিজৰ দেহত নিজেই দহগৰাকীকৈ ভাৰতৰ স্বাধীনতা সংগ্ৰামীৰ ছবি টেটুৰে অংকন কৰি ইণ্ডিয়া বুক অৱ ৰেকৰ্ডছত নাম সন্নিবিষ্ট কৰিবলৈ সক্ষম হৈছে যোৰহাটৰ এজন যুৱকে। যুৱক জনৰ নাম নিৰজ ভূঞা । যোৰহাটৰ মালৌআলি বাইপাছ সৰ্বাইবন্ধাৰ নিৰজ ভূঞাই সাত মিলিমিটাৰ কৈ স্বাধীনতা সংগ্ৰামী কেইগৰাকীৰ ছবি টেটুৰে আঁকি এই ৰেকৰ্ড গঢ়িবলৈ সক্ষম হৈছে ।

টেটুৰ কোনো আনুষ্ঠানিক শিক্ষা গ্ৰহণ নকৰাকৈ যুৱকজনে নিজৰ বাওঁ হাতত অংকন কৰি প্ৰতিচ্ছবি সমূহ অনলাইন যোগে ইণ্ডিয়া বুক অৱ ৰেকৰ্ডছলৈ প্ৰেৰণ কৰাৰ পাছত এই স্বীকৃতি লাভ কৰিছে । যুৱকজনে মহামানৱ মহাত্মা গান্ধী, ভগৎ সিং,নেতাজী সুভাষ চন্দ্ৰ বসু, চৰ্দাৰ বল্লভভাই পেটেল,চন্দ্ৰশেখৰ আজাদ,জৱাহৰলাল নেহেৰু,লালা লাজপত ৰায়,লাল বাহাদুৰ শাস্ত্ৰী, বি আৰ আম্বেদকাৰ আৰু ড৹ ৰাজেন্দ্ৰ প্ৰসাদৰ প্ৰতিচ্ছবি অংকন কৰিছিল । ইয়াৰ দুই মিনিট পাঁচ ছেকেণ্ডৰ ভিডিঅ' আৰু স্থিৰচিত্ৰ ইণ্ডিয়া বুক অৱ ৰেকৰ্ডছলৈ যোৱা নৱেম্বৰ মাহত প্ৰেৰণ কৰিছিল ।

হাতত টেটুৰে স্বাধীনতা সংগ্ৰামীৰ ছবি অংকন (ETV Bharat Assam)

ইয়াৰ পিছত ডিচেম্বৰত নিৰজলৈ আহিল ভাল খবৰটো । নিজৰ শৰীৰৰ বাওঁহাতত দহ গৰাকী স্বাধীনতা সংগ্ৰামীৰ ফটো অতি ক্ষুদ্ৰভাৱে টেটুৰে আঁকি ৰেকৰ্ড কৰাৰ অনুষ্ঠানিক স্বীকৃতি লাভ কৰে যোৰহাটৰ যুৱকজনে । এই প্ৰসংগত নিৰজ ভূঞাই কয়," মই সৰুৰে পৰাই এই কামত ব্ৰতী হৈছো । টেটু আঁকিবলৈ মই কোনো আনুষ্ঠানিক শিক্ষা লোৱা নাই । মই বিভিন্ন ঠাইত ঘূৰি থাকোতে যেতিয়া ভিন্ন ছৱি দেখা পাওঁ,তেতিয়া সেই ছৱি সমূহ টেটুৰ জৰিয়তে বাস্তৱ ৰূপ দিব পাৰি নেকি ভাবো । সেই উদ্দেশ্য আগত ৰাখি সাধনা কৰি গৈছিলো আৰু সফলতা লাভ কৰিলো । মই স্বাধীনতা সংগ্ৰামীৰ পৰা আৰম্ভ কৰি বিভিন্ন ধৰণৰ টেটু অংকণ কৰিছো । " এই স্বীকৃতি লাভ কৰি আনন্দ লাভ কৰা যুৱকজনে ইয়াৰ পৰবৰ্তী সময়ত এছিয়া বুক অৱ ৰেকৰ্ডছত নাম সন্নিবিষ্ট কৰাৰ প্ৰয়াস চলাব বুলিও কয় ।

লগতে পঢ়ক:ৰাস্তাৰ শিলগুটি এটাও হৈ উঠে প্ৰাণৱন্ত, নিৰ্জীৱ শিলৰ টুকুৰা জীয়াই উঠাৰ এক কাহিনী