আমগুৰি, ২০ মাৰ্চ :সমগ্ৰ দেশৰ লগতে ৰাজ্যৰ ৰাজনীতিতো এতিয়া উত্তপ্ত পৰিৱেশ । আগন্তুক লোকসভা নিৰ্বাচনৰ বাবে কঁকালত টঙালি বান্ধি নামিছে শাসক-বিৰোধী । যাৰ বাবে এতিয়া ৰাজনৈতিক বাক-বিতণ্ডাৰ উত্তাপত উৰ্ধ্বগামী হৈছে ৰাজ্যৰ ৰাজনৈতিক পৰিৱেশৰ পাৰাস্তম্ভ ।
ৰাজ্যৰ ১১ টা লোকসভা সমষ্টিত শাসকীয় দল বিজেপিয়ে প্ৰাৰ্থিত্ব প্ৰদান কৰিছে । তাৰে ভিতৰত দুটা সমষ্টি বিশেষভাৱে চৰ্চাত আছে । এটা হৈছে প্ৰাক্তন মুখ্যমন্ত্ৰী তথা এসময়ৰ লোকসভাৰ সাংসদ সৰ্বানন্দ সোণোৱালে প্ৰতিদ্বন্দ্বিতা কৰা ডিব্ৰুগড় লোকসভা সমষ্টি আৰু আনটো হৈছে যোৰহাট লোকসভা সমষ্টি ৷ সৰ্বানন্দ সোণোৱালৰ বিৰুদ্ধে প্ৰতিদ্বন্দ্বিতাত অৱতীৰ্ণ হৈছে এসময়ৰ ছাত্ৰ নেতা তথা অসম জাতীয় পৰিষদৰ সভাপতি লুৰীণজ্যোতি গগৈ । কিন্তু সকলোতকৈ বেছি চৰ্চাত আছে যোৰহাট লোকসভা সমষ্টি ।
যোৰহাট লোকসভা সমষ্টিটোৰ পৰা নিৰ্বাচনত অৱতীৰ্ণ হৈছে বৰ্তমানৰ সাংসদ তপন গগৈ আৰু গৌৰৱ গগৈ । কিন্তু নিৰ্বাচনৰ দিন চমু চাপি অহাৰ লগে লগে এই সমষ্টিটোৰ নিৰ্বাচনী বাতাৱৰণ অধিক আকৰ্ষণীয় হৈ পৰিছে । এফালে গৌৰৱ গগৈৰ বিৰুদ্ধে শাসকীয় দলৰ প্ৰায় সকলো নেতাই আক্ৰমণাত্মক প্ৰচাৰ চলাইছে, আনহাতে গৌৰৱ গগৈয়ে এই সকলোবোৰৰে অতি নম্ৰ আৰু ভদ্ৰভাৱে প্ৰতিক্ৰিয়া প্ৰকাশ কৰা দেখিবলৈ পোৱা গৈছে । বিশেষকৈ অসম চৰকাৰৰ মন্ত্ৰী পীযুষ হাজৰীকা শেহতীয়াভাৱে গৌৰৱ গগৈৰ বিৰুদ্ধে অতি আক্ৰমণাত্মক হোৱা দেখা গৈছে । কিন্তু তাৰে প্ৰতিক্ৰিয়া গৌৰৱ গগৈয়ে প্ৰকাশ কৰিছে অতি চতুৰতাৰে ।