27 বছৰৰ পিছত আকৌ আহি আছে "টাইটানিক"

2025-2026 নাট্যবৰ্ষত সোণালী জয়ন্তী বৰ্ষ উদযাপন কৰিব কহিনুৰ থিয়েটাৰে । এই সোণালী জয়ন্তী বৰ্ষতেই আকৌ এবাৰ কহিনুৰে মঞ্চস্থ কৰিব হেমন্ত দত্তৰ "টাইটানিক"।

গুৱাহাটী:ৰ'জ আৰু জেকৰ পুনৰ উভতনি কহিনুৰৰ মঞ্চলৈ । ভ্ৰাম্যমাণৰ জনপ্ৰিয় নাট্যগোষ্ঠী কহিনুৰ থিয়েটাৰে ৫০ বছৰীয়া যাত্ৰা উপলক্ষে পুনৰ এবাৰ মঞ্চস্থ কৰিব এসময়ত সমগ্ৰ বিশ্বত খলকনিৰ সৃষ্টি কৰা "টাইটানিক" । ১৯৯৮-১৯৯৯ নাট্যবৰ্ষত পোনপ্ৰথমবাৰ কহিনুৰৰ মঞ্চত মঞ্চস্থ হৈছিল "টাইটানিক"ৰ হেমন্ত দত্তই দিয়া নাট্যৰূপ । প্ৰথম বৰ্ষতেই দৰ্শকৰ বিপুল সমাদৰ লাব কৰাৰ পাছত দ্বিতীয়বাৰ ১৯৯৯-২০০০ বৰ্ষত এই নাটকখন মঞ্চস্থ কৰা হৈছিল ।

সোণালী জয়ন্তী বৰ্ষতেই তৃতীয়বাৰৰ বাবে আকৌ এবাৰ কহিনুৰৰ মঞ্চত এই নাটকখন মঞ্চস্থ কৰিবলৈ লোৱাৰ সিদ্ধান্ত সন্দৰ্ভত ই টিভি ভাৰতৰ সৈতে হোৱা এক বাৰ্তালাপত প্ৰযোজক তপন লহকৰে কয়-"কহিনুৰৰ ৫০ বছৰীয়া যাত্ৰা উপলক্ষে এখন বিশেষ নাটক কৰাৰ পৰিকল্পনা আছিল । বিশেষ নাটক বুলি ক'লে তিনিখন নাটকৰ ভিতৰত এখন পুৰণি নাটক কৰাৰ তাগিদা দৰ্শকৰ পৰাও আছিল, লগতে ময়ো এই কথাটো চিন্তা-চৰ্চা কৰি আছিলোঁ । নৱ-প্ৰজন্মৰ লগত খাপ খোৱাকৈ কোনখন নাটক ল'লে উপকৃত হ'ব পৰা যাব সেয়াও চিন্তা কৰা হৈছিল ।

তেনেকুৱা এটা কাৰণতেই হেমন্ত দত্তৰ 'টাইটানিক' নাটকখনেই পুনৰ মঞ্চস্থ কৰাৰ সিদ্ধান্ত ললো । কহিনুৰৰ প্ৰতি হেমন্ত দত্তৰ যথেষ্ট অৱদান আছে । তেনে পৰিপ্ৰেক্ষিতত তেখেতক এৰি ৫০ বছৰ উদযাপন কৰাটো ভাল কাম বুলি নিশ্চয় বিবেচিত নহ'ব । সেই সোণালী বৰ্ষ উপলক্ষে তেঁওক সন্মান জনোৱাৰ লগতে কহিনুৰৰ গৰিমাও যাতে অক্ষুণ্ণ থাকে তাৰে প্ৰচেষ্টা হাতত লোৱা হৈছে । 'টাইটানিক' নাটকখন সমগ্ৰ ভাৰতবৰ্ষতে সমাদৃত হৈছিল । এখন যুগমীয়া নাটক বুলিয়ে ক'ব পাৰি ।"

গুৰুজী আদ্য শৰ্মা অবিহনে "টাইটানিক"ৰ কাৰিকৰী দিশৰ দায়িত্ব ল'ব ?

তপন লহকৰে আৰু ক'লে- " টাইটানিক প্ৰথম মঞ্চস্থ হোৱাৰ সময়ত গুৰুজী আদ্য শৰ্মা, ৰতন লহকৰ, হেমন্ত দত্ত আৰু যি সমূহ কলা-কুশলী আছিল, সকলোৰে প্ৰচেষ্টাত নাটকখন মঞ্চস্থ হৈছিল । এতিয়াতো সেই মানুহখিনিৰ প্ৰায়ভাগেই নাই । তেনেস্থলত শাৰীৰিকভাৱে অসুস্থ যদিও হেমন্ত দত্ত ডাঙৰীয়াই অকণমান চাই দিম বুলি কৈছে । আনহাতে, দ্বিতীয়বাৰ মঞ্চস্থ হোৱাৰ সময়ত ময়ো অলপ জড়িত হৈ আছিলো ।

সেয়ে সমগ্ৰ দিশটোৰ ওপৰত মোৰ কিছু ধাৰণা আছে । তাকেই মূল অস্ত্ৰ হিচাপে লৈ আগবাঢ়িম । এটা উন্নত টীম বনাই আগবাঢ়িম । যিহেতু এইখনৰ লগতে আন দুখনো নাটকো আছে । তিনিওখন নাটক কিধৰণে আগবাঢ়িলে আমাৰ অসমৰ দৰ্শকে আঁকোৱালি ল'ব, সেইধৰণে মই আগবাঢ়িম ।"

উল্লেখযোগ্য যে প্ৰথমবাৰ নিকুমণি বৰুৱা আৰু কুন্তল গোস্বামীয়ে জেক আৰু ৰ'জৰ চৰিত্ৰটো কৰিছিল । কেপ্টেইনজনৰ চৰিত্ৰত অভিনয় কৰিছিল হেমন্ত দত্তই নিজেই । আনহাতে এইবৰ্ষত কহিনুৰত মুখ্য অভিনেতা হিচাপে থাকিব মৃদুল চুতীয়া । লগতে থাকিব কেইবাগৰাকীও জনপ্ৰিয় অভিনেতা-অভিনেত্ৰী ।

লগতে পঢ়ক:আৰম্ভ হৈছে নতুন নাট্যবৰ্ষৰ প্ৰস্তুতি, চাওঁ আহক কোন দলৰ তালিকাত কি কি নাটক আছে ?