হাৰিয়ানাৰ মুখ্যমন্ত্ৰী হিচাবে শপত গ্ৰহণ নায়ব সিং সাইনিৰ

হাৰিয়ানাৰ নতুন মুখ্যমন্ত্ৰী হিচাবে নায়ব সিং সাইনিৰ শপত গ্ৰহণ ৷ সাইনিৰ লগতে আন পাঁচজন বিধায়কে মন্ত্ৰী হিচাপে আজি শপত গ্ৰহণ কৰে । মুখ্যমন্ত্ৰী সাইনি আৰু তেওঁৰ নতুন কেবিনেট মন্ত্ৰীক শুভেচ্ছা প্ৰধানমন্ত্ৰী নৰেন্দ্ৰ মোদী আৰু বিজেপিৰ ৰাষ্ট্ৰীয় সভাপতি জে পি নাড্ডাৰ ৷

নিউজ ডেস্ক, ১২ মাৰ্চ: হাৰিয়ানাৰ নতুন মুখ্যমন্ত্ৰী হিচাবে নায়ব সিং সাইনিয়ে মঙলবাৰে সন্ধিয়া শপতগ্ৰহণ কৰে ৷ চণ্ডীগড় ৰাজভৱনত ৰাজ্যপাল বান্দৰু দত্তত্ৰেয়ে নায়ব সিং সাইনিক হাৰিয়ানাৰ নতুন মুখ্যমন্ত্ৰী হিচাপে শপত বাক্য পাঠ কৰোৱায় ৷ সাইনিৰ লগতে পাঁচজন বিধায়কে মন্ত্ৰী হিচাপে শপত গ্ৰহণ কৰে । তেওঁলোক ক্ৰমে কোঁৱৰপাল গুজ্জাৰ, ৰঞ্জিত সিং চৌটালা, মুলচান্দ শৰ্মা, জে পি দলাল আৰু বানৱৰী লাল ৷

এই শপত গ্ৰহণ অনুষ্ঠাত হাৰিয়ানাৰ প্ৰাক্তন তথা সদ্য পদত্যাগ মুখ্যমন্ত্ৰী মনোহৰলাল খট্টৰ উপস্থিত থাকে ৷ তেওঁ শপত গ্ৰহণৰ পূৰ্বে প্ৰাক্তন মুখ্যমন্ত্ৰী মনোহৰ লাল খট্টৰৰ চৰণ চুই আশীৰ্বাদ লয় আৰু তাৰ পিচত মুখ্যমন্ত্ৰী হিচাপে শপত গ্ৰহণ কৰে । ইফালে নায়ব সিং সাইনিয়ে মুখ্যমন্ত্ৰী হিচাপে শপত গ্ৰহণ কৰাৰ পাচত প্ৰধানমন্ত্ৰী নৰেন্দ্ৰ মোদী আৰু বিজেপিৰ ৰাষ্ট্ৰীয় সভাপতি জে পি নাড্ডাই নতুন মুখ্যমন্ত্ৰীৰ লগতে তেওঁ কেবিনেটক অভিনন্দন জ্ঞাপন কৰে ।

ছ’চিয়েল মিডিয়াত প্ৰধানমন্ত্ৰী মোদীয়ে লিখিছে যে হাৰিয়ানাৰ মুখ্যমন্ত্ৰী হিচাপে শপত লোৱা নায়ব সিং সাইনিক অভিনন্দন । হাৰিয়ানাৰ জনসাধাৰণৰ আকাংক্ষা পূৰণৰ প্ৰচেষ্টাত তেওঁৰ মন্ত্ৰী দললৈ শুভেচ্ছা জ্ঞাপন কৰিলোঁ । একেদৰে বিজেপিৰ ৰাষ্ট্ৰীয় সভাপতি জে পি নাড্ডাই টুইট কৰি হাৰিয়ানাৰ মুখ্যমন্ত্ৰী আৰু কেবিনেট সদস্যসকলে মন্ত্ৰী হিচাপে শপত গ্ৰহণ কৰাৰ বাবে অভিনন্দন আৰু শুভেচ্ছা জনায় ।

তেওঁ লগতে কয়, বিগত ৯ বছৰত ডাবল ইঞ্জিন চৰকাৰখনে ৰাজ্যখনৰ প্ৰতিটো ক্ষেত্ৰতে নতুন মানদণ্ড নিৰ্ধাৰণ কৰিছে । মোৰ সম্পূৰ্ণ বিশ্বাস যে প্ৰধানমন্ত্ৰী নৰেন্দ্ৰ মোদীজীৰ মাৰ্গদৰ্শন আৰু আপোনাৰ নেতৃত্বত আমাৰ জনকল্যাণ আৰু উন্নয়নৰ এই যাত্ৰা অব্যাহত থাকিব ।

লগতে পঢ়ক:হাৰিয়ানাত খট্টৰৰ প্ৰস্থান : মুখ্যমন্ত্ৰী হিচাবে নিৰ্বাচিত নায়ব সিং সাইনি