యాదాద్రి ఆలయ పునర్నిర్మాణ పనులను సీఎం కేసీఆర్ పరిశీలించారు. బాలాలయంలో దర్శనం, ప్రత్యేక పూజలు నిర్వహించి... తూర్పు రాజగోపురం వద్దకు చేరుకున్నారు. ఉదయం 11 గంటల 10 నిమిషాలకు గుట్టకు చేరుకున్న సీఎం... బాలాలయంలో ప్రతిష్ఠామూర్తల దర్శనం చేసుకుని... శ్రీ లక్ష్మీనరసింహ స్వామికి సువర్ణ పుష్పార్చన చేశారు.
ప్రాంగణ పనులపై ఆరా...
పండితులు, పూజారుల వేదాశీర్వచనం చేసిన తర్వాత పునర్నిర్మాణ పనుల వద్దకు చేరుకున్నారు. తూర్పు రాజగోపురం సమీపంలో కాసేపు తిరిగి ప్రాంగణ పనుల గురించి అడిగి తెలుసుకున్నారు. తూర్పు రాజగోపురం ఎదురుగా గల బ్రహ్మోత్సవ మండపంతోపాటు... శివాలయ కట్టడాల్ని చూశారు. శిల్పి ఆనంద్ సాయి, వైటీడీఏ ఉపాధ్యక్షుడు కిషన్రావు పనుల తీరును ముఖ్యమంత్రికి వివరించారు.
శిల్పాల పరిశీలన
అనంతరం గర్భాలయ ప్రాకారాలను తిలకించారు. ప్రాంగణంలో కలియ తిరుగుతూ అష్టభుజ మండప ప్రాకారాలను... ప్రవేశ మార్గం ఇరువైపులా తాను సూచించిన ఆధ్యాత్మిక శిల్ప రూపాలను పరిశీలించారు. క్షేత్ర పాలకుడైన ఆంజనేయస్వామి మందిరంతోపాటు ముఖ మండపంలోని ఉప ఆలయాలను చూశారు.
పండితులతో ముచ్చట
ధ్వజస్తంభం, బలిపీఠం పనుల తీరుపై... మార్పులు చేర్పుల గురించి స్తపతులతో మాట్లాడారు. ఆలయ ప్రధానార్చకులు నలంధిగల్ నరసింహాచార్యులతోపాటు ఇతర పండితులతో ముచ్చటించారు. పడమటి దిశలో రూపొందించాల్సిన వాటిపై... స్తపతులు, శిల్పితోపాటు యాదాద్రి ఆలయాభివృద్ధి ప్రాధికార సంస్థ నిర్వాహకులకు దిశానిర్దేశం చేశారు.
ఆలయ పూజారులతో చర్చ
మహారాజగోపురం చెంత ఏర్పాటైన జయవిజయుల స్వాగత దృశ్యాలను చూశాక... ఆలయ పూజారులతో చర్చించారు. సీఎం వెంట మంత్రులు జగదీశ్ రెడ్డి, ప్రశాంత్ రెడ్డి ఉన్నారు. గర్భాలయ ప్రాకార మండపాలను చూసిన తర్వాత కేసీఆర్... శివాలయం నిర్మాణాన్ని పరిశీలించారు.
- ఇవీ చూడండి: యాదాద్రీశుని సన్నిధిలో సీఎం కేసీఆర్
