ఔట్​సోర్సింగ్​ సిబ్బంది చేతివాటం.. బస్​పాస్​ల్లో అవకతవకలు

వరంగల్​ రీజియన్​ డిపోలో ఆర్టీసీ బస్​పాసుల విషయంలో గోల్​మాల్ జరిగింది.​ ఔట్​ సోర్సింగ్​ సిబ్బంది చేతివాటం వల్ల పెద్ద మొత్తంలో ఆర్టీసీ ఆదాయానికి గండి పడింది. అయితే ఈ ఒక్క డిపోలోనేనా లేక రాష్ట్రవ్యాప్తంగా కూడా ఇదే విధంగా జరిగి ఉంటుందా అనే కోణంలో అధికారులు ఆరా తీస్తున్నారు.

విద్యార్థుల బస్ పాసుల్లో అక్రమాలకు పాల్పడుతూ... ఆర్టీసీ సొమ్మును గుట్టు చప్పుడు కాకుండా కొల్లగొడుతున్న వైనం వరంగల్ ఆర్టీసీ రీజియన్​లో వెలుగు చూసింది. అవకతవకలకు సంబంధించి ఓ వ్యక్తి ఇచ్చిన సమాచారం మేరకు అధికారులు విచారణ జరుపగా పాసుల గోల్​మాల్ వ్యవహారం బయటపడింది.

బస్​పాసులే సీజనల్ ​పాసులు అయి..
బస్ పాసుల జారీని నెటెక్సల్ అనే సంస్థకు ఆర్టీసీ అప్పగించగా... ఈ సంస్థ సిబ్బంది విద్యార్థుల బస్​పాస్​లను నెలవారీ రెన్యువల్ చేస్తారు. అయితే ప్రతీ నెల పాసులు రెన్యువల్ చేయించని విద్యార్థుల వివరాలను కొంతమంది సిబ్బంది సేకరించి... వారి స్థానంలో ఉద్యోగులు, ఇతరుల సీజనల్ బస్ పాసులు తీసుకునే వారికి ఇచ్చేస్తున్నారు. ఆన్​లైన్​లో విద్యార్థికి జారీ చేసినట్లు ఉంటే కార్డులో మాత్రం సీజన్ బస్​పాసు దారుడి ఫోటో.. ధర ఉంటుంది. కాబట్టి ఎవ్వరికీ ఎలాంటి అనుమానం రాదు. 150 రూపాయల విద్యార్థుల బస్​పాస్ ధర ఉంటే.. సీజనల్ పాసుల ధరలు దూరాన్ని బట్టి పదిహేను వందలు, రెండు వేల వరకూ ఉంటుంది. ఆర్టీసీకి మాత్రం కేవలం 150 రూపాయలు మాత్రమే చెల్లించి... మిగతా డబ్బులు సిబ్బంది నొక్కేశారు.
ఒప్పందమే కొంపముచ్చేలా ఉంది..
పాసులు జారీని 2017 నుంచి నెట్​ఎక్సెల్ అనే ప్రైవేటు సంస్థకు అప్పగించారు. 2020 జులై వరకు పాసుల జారీకి ఈ సంస్థతో ఆర్టీసీ ఒప్పందం కుదుర్చుకుంది. రీజియన్ల వారీగా డిపోల పరిధిలో కౌంటర్లను ఏర్పాటు చేసి ఈ సంస్థ బస్ పాసులను జారీ చేస్తుంది. ఒక్కోపాస్​కు రూ. 30 చొప్పున తీసుకుంటారు. వరంగల్ ఒకటో డిపోకు సంబంధించి ఆన్​లైన్ బస్ పాసులు జారీ చేసే కేంద్రం హన్మకొండ బస్ స్టేషన్​లో ఉండగా... ఇందులో పని చేస్తున్న రాకేష్, శ్రీకాంత్ అనే ఇద్దరు సిబ్బంది ఈ అక్రమాలకు పాల్పడినట్లు తెలియడంతో పోలీసులకు ఫిర్యాదు చేశారు. కేసు నమోదు చేసుకున్న పోలీసులు నిందితులను విచారిస్తున్నారు.
రాష్ట్రవ్యాప్తంగా జరుగుతున్నాయా..?
పోలీసుల విచారణలో ఈ గోల్​మాల్ వెనుక మరికొందరు కూడా ఉన్నట్లు తెలియడం వల్ల అధికారులు మొత్తం అన్ని డిపోల పరిధిల్లోనూ బస్ పాసుల జారీలో అవకతవకలు జరిగాయా అన్నదీ విచారిస్తున్నారు. ఉన్నతాధికారుల పర్యవేక్షణలో పాసుల డబ్బుల గోల్​మాల్​పై శాఖాపరమైన విచారణ కొనసాగుతోంది. రాష్ట్ర వ్యాప్తంగా బస్ పాసులు జారీ చేస్తుంది నెట్​ఎక్సెల్ సంస్థ సిబ్బందే అయినందున ఈ తరహా అక్రమాలకు అవకాశం లేకపోలేదన్న అనుమానాలు వ్యక్తమవుతున్నాయి.
అసలే నష్టాల్లో ఉన్న ఆర్టీసీని ఈ తరహా మోసాలు మరింత నష్టాల పాలుచేస్తుందనడంలో ఎలాంటి సందేహమూ లేదు. ఆర్టీసీ అధికారులు సమగ్ర విచారణ జరిపితేనే... వాస్తవాలు వెలుగులోకి వస్తాయి.

ఇదీ చూడండి: సరకు రవాణాకు.. సిద్ధం కాబోతున్న ఆర్టీసీ బస్సులు