సూర్యాపేట జిల్లా నేరేడుచర్ల పురపాలిక ఛైర్మన్, వైస్ ఛైర్మన్ ఎన్నిక నేడు జరగనుంది. అనేక పరిణామాల మధ్య ఎన్నికను సోమవారం రెండు సార్లు వాయిదా వేయాల్సివచ్చింది. నేరేడుచర్ల పురపాలికలో మొత్తం 15 స్థానాలకు గాను తెరాస, కాంగ్రెస్ ఏడేసి వార్డుల చొప్పున గెలుచుకోగా... సీపీఎం ఒకటి దక్కించుకుంది. కాంగ్రెస్ మిత్రపక్షమైన సీపీఎంతో పీఠం నిలబెట్టుకోవాలని... హస్తం పార్టీ భావించింది.
కానీ ఎక్స్అఫిషియో సభ్యులుగా హుజూర్నగర్ శాసనసభ్యుడు శానంపూడి సైదిరెడ్డితోపాటు రాజ్యసభ సభ్యుడు బడుగుల లింగయ్య యాదవ్, ఎమ్మెల్సీ బోడకుంట్ల వెంకటేశ్వర్లు ఉండటంతో... తెరాస బలం పదికి చేరుకుంది. సీపీఎంతో కలిపి ఎనిమిది స్థానాలున్న కాంగ్రెస్... ఎంపీ ఉత్తమ్ కుమార్ రెడ్డితో పాటు రాజ్యసభ సభ్యుడు కేవీపీ ఓటుతో వారి సంఖ్య కూడా పదికి చేరుకుంది.
కేవీపీకి సానుకూలం..
కేవీపీ పేరును ఎక్స్అఫిషియో సభ్యుడిగా ముందుగానే నమోదు చేయించినా... తుది జాబితాలో కనపడలేదు. దీంతో ఉత్తమ్ సహా ఆ పార్టీ నాయకులు, కార్యకర్తలు... సూర్యాపేటలో కలెక్టర్ కార్యాలయం ఎదుట బైఠాయించారు. మూణ్నాలుగు గంటల పాటు అక్కడే ఆందోళన నిర్వహించారు. కేవీపీకి ఓటు హక్కు కల్పించాలంటూ ఎన్నికల సంఘాన్ని ఉత్తమ్ ఆశ్రయించారు. ఈసీ.. కేవీపీకి సానుకూలంగా ఉత్తర్వులిచ్చింది. కమిషనర్ ఉత్తర్వులను రద్దు చేస్తున్నట్లు ప్రకటించింది.
ఉత్తమ్- సైదిరెడ్డి మధ్య మాటల యుద్ధం
ఎస్ఈసీ ధ్రువీకరించిన పత్రం ఉదయం 11 గంటలకు స్థానిక అధికారులకు చేరింది. అప్పటికే ఇద్దరు తెరాస సభ్యుల ప్రమాణ స్వీకారం కూడా పూర్తయింది. ఆ సమయంలోనే కాంగ్రెస్ సభ్యులు కేవీపీ పేరుతో కూడిన జాబితాతో పురపాలికకు చేరుకున్నారు. ఆదివారం జాబితాలో లేని పేరు... ఈ రోజు ఎలా చేర్చారంటూ ఎమ్మెల్యే సైదిరెడ్డి అభ్యంతరం తెలిపారు. ఆగ్రహంతో ఆదేశాల ప్రతిని విసిరికొట్టారు. ఉత్తమ్, సైదిరెడ్డి మధ్య మాటల యుద్ధం చోటుచేసుకుంది. సమావేశం వాయిదా వేయాలని ఎమ్మెల్యే అడగగా.. తలొగ్గిన అధికారులు ఈరోజుకి వాయిదా వేశారు.
నేటికి వాయిదా..
అంతకుముందు జరిగిన పరిణామాలతో... తెరాస సభ్యులంతా వెళ్లిపోయారు. ఎస్ఈసీ ఆదేశాల మేరకు సాయంత్రం సమావేశం కావాలంటే... సభ్యులందర్నీ ఆహ్వానించాల్సి ఉంటుంది. ఇందుకు నోటీసులు ఇవ్వాలి. వారు అందుబాటులో లేరంటూ అధికారులు... ఎన్నికల సంఘానికి మరోసారి నివేదిక పంపారు. చేసేదిలేక ఎస్ఈసీ... ఎన్నికను ఇవాళ్టికి వాయిదా వేయాల్సి వచ్చింది.
ఇవీ చూడండి: ఆశ్చర్యం: చనిపోయిన వ్యక్తి.. కొన్నిరోజులకు బతికొచ్చాడు!
