విహారయాత్రకు వెళ్లి వస్తుండగా రోడ్డు ప్రమాదం... ముగ్గురు మృతి

మిత్రులంతా కలిసి ఎంతో ఉత్సాహంగా విహారయాత్రకు వెళ్లి ఆనందించారు.  దైవదర్శనం చేసుకుని తిరుగు  ప్రయాణమయ్యారు. కానీ వారి ఆనందం కొద్ది గంటల్లోనే విషాదమైంది. గమ్యస్థానానికి చేరేలోపే ఆ బృందంలోని ముగ్గురు యువకులు విగతజీవులయ్యారు. ఇంజినీరింగ్​ విద్యార్థుల విహారయాత్ర... తల్లిదండ్రులకు గర్భశోకాన్ని మిగిల్చించింది.

హైదరాబాద్-విజయవాడ జాతీయ రహదారిపై ఘోర రోడ్డు ప్రమాదం జరిగింది. హైదరాబాద్​లోని గురునానక్ ఇంజినీరింగ్ కళాశాలకు చెందిన ముగ్గురు విద్యార్థులు సుర్యాపేట జిల్లా మునగాల మండలం మొద్దుల చెరువు సమీపంలో రోడ్డు ప్రమాదానికి గురై మృతి చెందారు. 3 రోజుల క్రితం రెండు కార్లలో 16 మంది ఇంజినీరింగ్​ మూడో సంవత్సరం విద్యార్థులు విహారయాత్రకు బయలుదేరి వెళ్లారు. ఆంధ్రప్రదేశ్​లోని గుంటూరు జిల్లాలోని బాపట్ల, తెనాలి బీచ్​ సందర్శించుకున్నారు. తిరుగు ప్రయాణంలో విజయవాడ కనకదుర్గమ్మ ఆలయంలో పూజలు చేసి ప్రయాణమయ్యారు.

ముగ్గురు అక్కడికక్కడే మృతి...

సుర్యాపేట జిల్లా మునగాల సమీపంలో కారు అదుపుతప్పి డివైడర్​ను ఢీ కొట్టింది. ఫల్టీలు కొట్టిన కారు నుజ్జునుజ్జయింది. ఈ ప్రమాదంలో హర్ష, రేవంత్ , శశాంక్ అనే విద్యార్థులు అక్కడికక్కడే మృతి చెందారు. ప్రణీత్, ఆసీఫ్, అజయ్, నిఖిల్ తీవ్రంగా గాయపడ్డారు. ఈశ్వర్ అనే యువకుడు స్వల్ప గాయాలతో బయటపడ్డాడు. క్షతగాత్రులందరినీ సూర్యాపేట జిల్లా కేంద్ర ఆసుపత్రికి తరలించారు.

ఇవీ చూడండి: ప్రమాదవశాత్తు ఎగిసిపడిన మంటలు.. హోటల్​ దగ్ధం