మూడేళ్ల చిన్నారికి ఓటు హక్కు.. వయసు 35 ఏళ్లు

రాష్ట్రంలో పురపాలక ఎన్నికల నేపథ్యంలో జిల్లాల వారీగా ఓటర్ల జాబితాను విడుదల చేశారు. కానీ ఒక్కో జిల్లాలో ఒక్కొ విధంగా రకరకాలు తప్పులు బయటపడుతున్నాయి. ఇటీవల నిర్మల్​ జిల్లాలో ఒక వార్డులోని ఓటర్ల పేర్లు మరొక వార్డులో తప్పుగా వచ్చాయి. తాజాగా కరీంనగర్‌ జిల్లాలో మూడేళ్ల చిన్నారికి ఓటు హక్కు ఉన్నట్టు, వయసు 35 ఏళ్లుగా ప్రచురితమైంది.

కరీంనగర్‌ నగరపాలక సంస్థ ఇటీవల ప్రకటించిన ముసాయిదా ఓటర్ల జాబితాలో ఓ చిన్నారికి చోటు దక్కింది. నగరంలో కొత్తగా ఏర్పడిన 30వ డివిజన్‌లో మారుతీనగర్‌, పాత బజారు ప్రాంతాలను కలుపుతూ 5,007 మందిని ఓటర్లుగా ప్రకటించారు. ఆ ఓటర్ల జాబితాలోని నం.5-6-434 గల ఇంటిలో 4249 వరుస సంఖ్యతో ఓ చిన్నారి ఫొటో ప్రత్యక్షమైంది.

అది కూడా నెలల బిడ్డగా ఉన్నప్పటి చిత్రంలా ఉంది. ఆమె పేరు శ్రీ నందిత మెతుకు తండ్రి పేరు రమేశ్‌. వయసు 35 ఏళ్లుగా పేర్కొన్నారు. కానీ ప్రస్తుతం ఆ బాలిక వయసు మూడేళ్లు. ఓ ప్రైవేటు పాఠశాలలో ఎల్‌కేజీ చదువుతోంది.

ఇదీ చూడండి : ప్లాస్టిక్ రహిత సమాజమే ఈ అక్కాచెల్లెళ్ల లక్ష్యం!