పురపోరులో అధికార, విపక్షాలు పోటాపోటీగా తలపడే మున్సిపాలిటీల్లో గద్వాల ఒకటి. 39 వార్డులున్న గద్వాలలో 80వేల జనాభా ఉండగా... 59వేల మంది ఓటర్లున్నారు. గద్వాల కోట పీఠాన్ని చేజిక్కించుకునేందుకు ప్రధాన పార్టీలు తీవ్రంగా శ్రమిస్తున్నాయి.
జోరు సాగించేందుకు కారు వ్యూహం...
ఇప్పటివరకు జరిగిన అన్ని ఎన్నికల్లో జోరు సాగించిన కారు... బల్దీయా బరిలోనూ విజయపరంపర కొనసాగించాలని ఉవ్విళ్లూరుతోంది. అన్ని వార్డుల తెరాస అభ్యర్థులను ఎమ్మెల్యే కృష్ణమోహన్ రెడ్డి ముందుగానే ప్రకటించారు. ఛైర్మన్ అభ్యర్థిగా బీఎస్ కేశవ్ను ఖరారు చేశారు. 37వార్డులకు 77మంది తెరాస తరఫున నామపత్రాలు దాఖలు చేయగా... అసమ్మతి నేతలను బుజ్జగించే పనిలో నాయకత్వం తలమునకలైంది. అందరినీ కలుపుకొని పోతూ పీఠాన్ని కైవసం చేసుకుంటామని నేతలు ధీమా వ్యక్తం చేస్తున్నారు.
గద్వాల కోటపై కాషాయ జెండా ఎగరేస్తాం...
గద్వాల మున్సిపాలిటీని భాజపా సైతం ప్రతిష్ఠాత్మకంగా తీసుకుంది. డీకే అరుణ సొంత పట్టణం కావటం వల్ల తమకున్న బలాన్ని నిరూపించుకునేందుకు తీవ్ర కసరత్తు చేస్తున్నారు. భాజపా తరపున 37వార్డులకు గానూ 80మంది వరకు నామపత్రాలు దాఖలు చేశారు. అసంతృప్తులకు నేతలు నచ్చజెప్పే పనిలో పడ్డారు. తెరాస సర్కారు వైఫల్యాలను ఎండగట్టటమే ప్రచారాస్త్రంగా డీకే అరుణ జట్టు అధికారపార్టీకి గట్టి పోటీ ఇచ్చేందుకు సిద్ధమైంది.
ఆదరణ తగ్గలేదంటున్న హస్తం...
డీకే అరుణ కాంగ్రెస్ పార్టీ వీడినా... కార్యవర్గం బలంగానే కొనసాగుతోంది. దాదాపు అన్నివార్డుల్లో కాంగ్రెస్ అభ్యర్థులు పోటీ చేస్తున్నారు. తెరాస- భాజపా మధ్య కాంగ్రెస్ ఓట్లు చీల్చే అవకాశం ఉంది. తెరాస ప్రభుత్వంపై ప్రజలు తీవ్ర అసంతృప్తిగా ఉన్నారని కాంగ్రెస్కు అన్ని చోట్ల మంచి ఆదరణ కన్పిస్తోందని ఆశాభావం వ్యక్తం చేస్తున్నారు హస్తం నేతలు.
శంకర్, కాంగ్రెస్ సీనియర్ నాయకులు
తెరాస వ్యూహాత్మకంగా ముందుకు సాగుతున్నా... డీకే కుటుంబానికి పట్టణంలో పట్టున్నా.. ఇరువురికి గెలుపు నల్లేరుపై నడక కాదు. అభ్యర్థికి ప్రజల్లో ఉన్న సానుకూలత, స్థానిక సమస్యలు... వాటి పరిష్కారం సహా పలు అంశాలు గెలుపోటములపై ప్రభావం చూపే అవకాశం ఉందంటున్నారు విశ్లేషకులు.
ఇవీ చూడండి: బస్తీమే సవాల్: వేములవాడ, ధర్మపురిలో మున్సిపల్ సందడి
