ఒడిశా రాష్ట్రంలోని గజపతి జిల్లా రాయగఢ సమితిలో ఏ చిన్న పనికి బయటికి వెళ్లాలన్నా గెడ్డ దాటాల్సిందే. ప్రాణాలు అరచేత పట్టుకొని ప్రయాణం చేయాల్సిందే. గెడ్డ ఉద్ధృతంగా ప్రవహిస్తున్న 6 మాసాలు ఇదే పరిస్థితి. రాయగడ సమితిలోని చంచడా సాహి, తొబార్‌సింగ్‌ గిరిజన ప్రాంతాల్లోవంతెనలు లేక గిరిజనులు పడరాని పాట్లు పడుతున్నారు. ఏ పనికి వెళ్లాలన్నా చెట్టు ఎక్కి..గెడ్డ దాటాల్సిందే.
చెట్టే ఆధారం
గెడ్డ దాటేందుకు ఉన్న ఏకైక ఆధారం ఓ చెట్టు. ఈ చెట్టు కొమ్మలు గెడ్డపైన సగ భాగం కన్నా ఎక్కువ విస్తీర్ణంలో వ్యాపించి ఉన్నాయి. గ్రామస్థులు తయారు చేసుకున్న వెదురు కర్ర వంతెన ద్వారా కొమ్మ పైకి చేరుకొని అక్కడి నుంచి చెట్టు మీదుగా అవతలికి చేరుకుంటారు. ఒక పాదం పట్టే స్థలం ఉన్న ఈ చెట్టు కొమ్మపై ఏ మాత్రం అదుపు తప్పినా ప్రమాదమే. గతంలో కొందరు పట్టుతప్పి గెడ్డలో పడి కొట్టుకుపోయిన ఘటనలూ ఉన్నాయి.
