చిరుద్యోగి మంచితనం.. ఉన్నతాధికారి స్వార్థం

రైల్వో స్టేషన్​లో పనిచేస్తున్న ఓ సఫాయి వాలా తన నిజాయితీ చాటుకుంటే.. లక్షల్లో జీతాలు తీసుకునే అతని పై అధికారి మాత్రం దొంగ బుద్ధి చూపించాడు. బంగారం దొరికి మూడు నెలలు అవుతున్నా ఆ అధికారి మాత్రం బాధితులకు అప్పగించలేదు. మీడియా కథనాల ద్వారా ఈ విషయం ఆలస్యంగా వెలుగులోకి వచ్చింది. ఈ ఘటన ఏపీలోని అనంతపురం జిల్లా గుంతకల్లు రైల్వే జక్షన్​లో జరిగింది.

ఏపీలోని అనంతరపురం జిల్లా గుంతకల్లు రైల్వే జంక్షన్లో ఓ సఫాయి వాలా తన నిజాయితీ చాటుకున్నాడు. తన తోటి సహచర మిత్రులు, అధికారులతో ఔరా అనిపించుకున్నాడు. నిత్యం వేలాది మంది ప్రయాణికులతో రద్దీగా ఉండే గుంతకల్లు రైల్వే స్టేషన్​లో సఫాయి వాలాగా కాంట్రాక్టు పద్ధతిలో గన్నె రామాంజనేయులు విధులు నిర్వర్తిస్తున్నాడు. రోజు మాదిరిగానే ఉదయాన్నే తన విధులు నిర్వర్తిస్తుండగా సెప్టెంబర్ 2న 6వ నెంబర్​ ప్లాట్ ఫామ్​పై పడిఉన్న నగల బ్యాగ్​ను చూశాడు. వెంటనే తన ఉన్నతాధికారులకు బ్యాగ్​ను అందించాడు.

మూడు నెలలు తన వద్దే

అదే గుంతకల్లు జంక్షన్​లో హెల్త్ ఇన్​స్పెక్టర్​గా విధులు నిర్వహిస్తున్న అమర్నాథ్ మాత్రం దురుద్దేశంతో మొత్తం బంగారు ఆభరణాలను మూడు నెలలకు పైగా అనధికారంగా తన వద్దే ఉంచుకున్నాడు. ఈ విషయం ఆలస్యంగా మీడియా కథనాల ద్వారా వెలుగులోకి వచ్చింది. అప్పటికి స్పందించిన జీఆర్​పీ పోలీసులు విచారణ ప్రారంభించారు. మొదట్లో బంగారం సంగతి తనకేం తెలియదని బుకాయించిన అమర్నాథ్ ఎట్టకేలకు బంగారాన్ని పోలీసులకు అప్పచెప్పాడు.

బదిలీ

పోలీస్ స్టేషన్​కు వెళ్లిన మీడియా ప్రతినిధులకు... ఎవరినీ విచారణ నిమిత్తం స్టేషన్​కు తీసుకురాలేదని చెప్పిన సిబ్బంది మరో ద్వారం గుండా అమర్నాథ్​ను పంపించేశారు. అది గమనించిన విలేకరులు.. అతడిని వివరణ అడగడానికి ప్రయత్నిస్తే ఆగకుండా పరుగులు తీశాడు. అవినీతి ఆరోపణలు ఎదుర్కొంటున్న ఆ అధికారిని మరో ప్రాంతానికి బదిలీచేస్తూ అధికారులు ఉత్తర్వులు జారీ చేసినట్టు తెలిపారు.

నాగర్ కోయిల్ ఎక్స్​ప్రెస్

సెప్టెంబర్ 2న మహారాష్ట్రకు చెందిన ఇద్దరు దంపతులు నాగర్ కోయిల్ ఎక్స్​ప్రెస్ రైలు ఎక్కుతున్న హడావుడిలో బంగారు నగలున్న బ్యాగ్​ను ప్లాట్ ఫారంపై పోగొట్టుకున్నారని పోలీస్​ అధికారి తెలిపారు. మహారాష్ట్రలో బంగారు ఆభరణాలు అపహరణకు గురయ్యాయని ఇద్దరు దంపతులు అక్కడి పోలీస్ స్టేషన్​లో కేసు నమోదు చేసినట్లు తమ విచారణలో తెలిసిందన్నారు.

ఇదీ చూడండి: గోదాం నిర్మాణాలకు కేంద్రం సహకరించాలి: నిరంజన్‌రెడ్డి