దేశవ్యాప్తంగా సంచలనం రేకెత్తించిన దిశ నిందితుల మృతదేహాలను ఈనెల 13 వరకు భద్రపరచాలని ఉన్నత న్యాయస్థానం ఆదేశించింది. ఏసీ వాహనాల్లో గాంధీ మార్చురీకి తరలించాలని పేర్కొంది. ఎన్కౌంటర్పై పలు మహిళ, ప్రజా సంఘాల ప్రతినిధులు రాసిన లేఖను ప్రజాప్రయోజన వ్యాజ్యంగా స్వీకరించిన హైకోర్టు విచారణ చేపట్టింది.
సుప్రీం మార్గదర్శకాలు పాటించారా?
ఎన్కౌంటర్ల విషయంలో సుప్రీంకోర్టు పేర్కొన్న మార్గదర్శకాలను అనుసరించారా? పోలీసులపై కేసు నమోదు చేశారా? అని అడ్వొకేట్ జనరల్ బీఎస్ ప్రసాద్ను హైకోర్టు ప్రశ్నించింది. సుప్రీంకోర్టు మార్గదర్శకాలకు అనుగుణంగా అన్ని చర్యలు చేపట్టామని... ఘటనపై కేసు నమోదు కాగా.. పోలీసులపై చేయలేదని ఏజీ పేర్కొన్నారు.
భద్రపరచండి..
ఇదే అంశంపై సుప్రీంకోర్టులో విచారణ బుధవారానికి వాయిదా వేసినందున... హైకోర్టులో విచారణ గురువారానికి వాయిదా వేయాలని హైకోర్టును ఏజీ కోరారు. అంగీకరించిన ధర్మాసనం.. మృతదేహాలు చెడిపోకుండా ఏసీ వాహనాల్లో గాంధీ మార్చురీకి తరలించి.. శుక్రవారం వరకు భద్రపరచాలని స్పష్టం చేసింది. కేసు విచారణకు సహకరించేందుకు సీనియర్ న్యాయవాది దేశాయ్ ప్రకాశ్ రెడ్డిని అమికస్ క్యూరీగా హైకోర్టు నియమించింది.
బాధిత కుటుంబాలకు పరిహారం
ఎన్కౌంటర్పై సిట్టింగ్ లేదా విశ్రాంత న్యాయమూర్తితో విచారణకు ఆదేశించాలని.. పోలీసులపై హత్య కేసు నమోదు చేయాలని కోరుతూ న్యాయవాది రాఘవేంద్ర ప్రసాద్ ప్రజా ప్రయోజన వ్యాజ్యం దాఖలు చేశారు. మృతుల కుటుంబాలకు రూ.50 లక్షల చొప్పున పరిహారం చెల్లించేలా ఆదేశాలు ఇవ్వాలని కోరారు. దిశ కుటుంబానికి కూడా పరిహారం చెల్లించేలా ఆదేశించాలని విన్నవించారు. రెండింటిని కలిపి హైకోర్టు విచారణ చేపట్టింది.
ఇదీ చూడండి: ఎన్హెచ్ఆర్సీ ఎదుట దిశ తండ్రి, సోదరి... అరగంటపాటు విచారణ
