హైదరాబాద్ దుండిగల్ ఎయిర్ ఫోర్స్ అకాడమీలో 127 మంది ఫ్లైయింగ్ అండ్ గ్రౌండ్ డ్యూటీ క్యాడెట్లు శిక్షణ ముగింపు కార్యక్రమంలో సందడిగా సాగింది. కంబైన్డ్ పాసింగ్ అవుట్ పరేడ్లో 21 మంది మహిళలుండగా.. అందులో ఐదుగురు ఫ్లైయింగ్ ఆఫీసర్లుగా ఎంపికయ్యారు. ఆర్తి తోమర్ ఫైటర్ పైలెట్గా ఎంపికయ్యారు. ఫైటర్స్, ట్రాన్స్ పోర్ట్, హెలికాఫ్టర్ నావిగేషన్ వంటి ఫ్లైయింగ్ విభాగాలకు, అడ్మినిస్ట్రేషన్, లాజిస్టిక్స్, అకౌంట్స్, మెటిరియాలజీ వంటి గ్రౌండ్ డ్యూటీ విభాగాలకు చెందిన మొత్తం 127 మంది అధికారులున్నారు. పరేడ్లో క్యాడెట్ల మార్చ్ఫాస్ట్, వాయు సేన బ్యాండ్, లయబద్ధమైన కవాతు ఆకట్టుకున్నాయి.
ఈ కార్యక్రమానికి ఎయిర్ చీఫ్ మార్షల్ ఆర్కే సింగ్ బదౌరియా ముఖ్య అతిథిగా హాజరయ్యారు. శిక్షణ పూర్తి చేసుకున్న అభ్యర్థులకు బ్యాడ్జిలను అందించి.. శుభాకాంక్షలు తెలియజేశారు. ఎంపికైన ఉద్యోగుల గౌరవ వందనాన్ని స్వీకరించి.. వారితో నిబద్ధతతో పనిచేస్తామని ప్రతిజ్ఞ చేయించారు. ఫ్లైయింగ్ ఆఫీసర్ అనురాధా చక్రబోర్తికి స్వార్డ్ ఆఫ్ హానర్ అవార్డుతో సత్కరించారు.
శిక్షణ పూర్తి చేసుకొని భారత వాయుసేన తరుఫున విధుల్లో చేరడం ఎంతో గర్వంగా.. ఉత్సుకతతో ఉన్నామని నూతనంగా ఎంపికైన ఆఫీసర్లు తమ ఆనందాన్ని పంచుకున్నారు. పరేడ్ అనంతరం హెలికాఫ్టర్లు, తేజస్ ఫైటర్ జెట్లు, సూర్యకిరణ్ ఫైటర్ విమానాలతో చేసిన పలు విన్యాసాలు సందర్శకులను ఆకట్టుకున్నాయి.
ఇవీ చూడండి: ఎయిర్ ఫోర్స్ అకాడమీలో గ్రాడ్యుయేషన్ పరేడ్ వేడుకలు
