'దేవుడి చెట్టు ఎండిపోయింది.. ఏం జరుగుతుందో..!'

సాంకేతికత ఎంత అభివృద్ధి చెందుతున్నా.. ఇంకా కొన్ని గ్రామాల్లో ప్రజలు మూఢ నమ్మకాలతో వెనుకబడిపోతున్నారు. తమ ఊరిలోని దేవుడి చెట్టు ఎండిపోయిందనీ.. అలా జరగడం అరిష్టమని.. ఇప్పుడేం జరుగుతుందో అని భయపడుతున్నారు ఆ ఊరి గ్రామస్థులు. భక్తిగా కొలిచే చెట్టు ఎండిపోవడం చూసి అశుభానికి ప్రతీకగా అక్కడి వారు భావిస్తున్నారు. నెల్లూరు జిల్లా పుట్టుపల్లిలో ఎండిన దేవుని చెట్టు గురించి మనమూ తెలుసుకుందామా..!

నెల్లూరు జిల్లా చేజర్ల మండలం పుట్టుపల్లిలో దర్గా చెట్టును ఆ ఊరివారు దేవుడి చెట్టుగా భావిస్తారు. ఆ గ్రామంలో ఏ ఇంట్లో శుభకార్యం జరిగినా ఆ చెట్టుకు పూజలు చేసి జెండా ఉంచుతారు. ఇది ఆ ఊరి ఆనవాయితీ. అయితే.. తాము ఎంతో భక్తిగా కొలిచే ఈ చెట్టు ఉన్నట్లుండి ఎండిపోయిందనీ.. ఇలా జరగడం అశుభానికి ప్రతీక అని గ్రామస్థులు అంటున్నారు.

ఇటీవల కురిసిన వర్షాలకు చెట్టు చిగురించాలి కానీ.. ఇలా అకస్మాత్తుగా ఎండిపోవడమేంటో తమకు అర్థం కావట్లేదని ఆందోళన వ్యక్తం చేశారు. ఈ సంఘటనతో గ్రామంలో ఏం జరుగుతుందో అని భయపడుతున్నామని తెలిపారు.

• ఇదీ చూడండి : తను కన్నవారికీ... తనను కన్నవారికీ... తనే అమ్మ!