ఎంతో హాయిగా సాగుతున్న జీవనం... మంచి ఉద్యోగం.. మండల స్థాయి అధికారి హోదా.. తల్లిదండ్రులు ఉపాధ్యాయులు.. భర్త ప్రభుత్వ కళాశాల అధ్యాపకుడు.. ఇద్దరు పిల్లలు. ఇలా ఆనందంగా సాగిపోతున్న కుటుంబం విజయారెడ్డిది. ఆమె దారుణహత్యకు గురవ్వడంతో ఆ కుటుంబ ఆనందం మంటల్లో కాలి బూడిదయ్యింది. అబ్దుల్లాపూర్ మెట్ తహసీల్దార్ సీహెచ్ విజయారెడ్డి కుటుంబంలో అందరూ విద్యాధికులే.
కుటుంబం అంతా విద్యాధికులే...
నల్గొండ జిల్లా నకిరేకల్ మండలం పెరికెకొండారం గ్రామానికి చెందిన సీహెచ్ లింగారెడ్డి వినోద దంపతుల కుమార్తె విజయారెడ్డి. తల్లిదండ్రులిద్దరూ ఉపాధ్యాయులే. ఆమె సోదరి సంధ్యారాణి ప్రభుత్వ ఉపాధ్యాయురాలిగా పనిచేస్తున్నారు. విజయారెడ్డి తొలి ప్రయత్నంలోనే డీఎస్సీ ద్వారా ఎస్జీటీగా ఉద్యోగం సాధించి నల్గొండ జిల్లా సంస్థాన్ నారాయణపురంలో కొంతకాలం ప్రభుత్వ ఉపాధ్యాయురాలిగా పనిచేశారు.
ఉత్తమ తహసీల్దార్గా ప్రశంస...
అనంతరం మొదటి ప్రయత్నంలోనే 2009లో గ్రూపు-2 పరీక్షలు రాసి డిప్యూటీ తహసీల్దారుగా ఎంపికయ్యారు. జిల్లాల విభజన తర్వాత రంగారెడ్డి జిల్లాకు వచ్చి అబ్దుల్లాపూర్మెట్ మండల తొలి తహసీల్దార్గా 2016లో బాధ్యతలు చేపట్టారు. మూడేళ్లుగా ఇక్కడే పనిచేస్తున్నారు. 2017లో జిల్లాస్థాయి ఉత్తమ తహసీల్దార్గా ఎంపికై ప్రశంసాపత్రం అందుకున్నారు. విజయారెడ్డికి మునుగోడు ప్రాంతానికి చెందిన పుట్టా సుభాష్రెడ్డితో వివాహమైంది. భర్త హయత్నగర్ డిగ్రీ కళాశాలలో అధ్యాపకుడిగా పనిచేస్తున్నారు. ప్రస్తుతం ఆమె కుటుంబంతో చైత్యపురి సమీపంలోని గ్రీన్హిల్స్ కాలనీలో నివాసం ఉంటోంది. విజయ హత్య విషయం తెలుకుని ఆమె భర్త సుభాష్రెడ్డి కార్యాలయానికి చేరుకొని మృతదేహాన్ని చూసి గుండెలవిసేలా రోదించారు. అనంతరం అక్కడికి చేరుకున్న విజయారెడ్డి తల్లి వినోద గుండెలు 'బాదుకుంటూ అమ్మా.. నిన్ను పెద్ద చదువులు చదివించింది ఇందుకేనా..?' అంటూ రోదించారు.
ఇదీ చూడండి: తహసీల్దార్ని తగలబెట్టేశాడు... కారణం ఇదే..!
