కొత్త టీపీసీసీ అధ్యక్షుడి ఎంపికపై కాంగ్రెస్​ కసరత్తు

మహారాష్ట్ర, హరియాణా ఎన్నికలు పూర్తయినందున రెండు తెలుగు రాష్ట్రాల ప్రదేశ్‌ కాంగ్రెస్‌ కమిటీ అధ్యక్షుల ఎంపికపై కాంగ్రెస్‌ అధిష్ఠానం దృష్టిసారించింది. ఏపీలో కొత్త పీసీసీ చీఫ్‌ ఎంపికపై ఇప్పటికే కసరత్తు మొదలు పెట్టిన ఏఐసీసీ... తెలంగాణలో పీసీసీ అధ్యక్షుడి ఎంపికపై త్వరలో కసరత్తు మొదలు పెట్టనుంది. రాష్ట్రంలో పీసీసీ కోసం పెద్ద సంఖ్యలో పోటీ పడుతుండడం వల్ల సీనియర్‌ నేతల అభిప్రాయసేకరణ తర్వాతే కొత్త చీఫ్‌ను ప్రకటించాలని ఏఐసీసీ నిర్ణయించింది.

హుజూర్‌నగర్‌ ఉపఎన్నికల్లో ఓటమి పాలైన తర్వాత దిల్లీ వెళ్లిన పీసీసీ చీఫ్​ ఉత్తమ్‌... ఏఐసీసీ అధ్యక్షురాలు సోనియాగాంధీని కలిసి తనను పీసీసీ అధ్యక్ష పదవి నుంచి తప్పించాలని విజ్ఞప్తి చేసినట్లు తెలుస్తోంది. ఉత్తమ్​ తప్పుకుంటున్నట్లు తెలియడం వల్ల ఆ పదవి కోసం పోటీ పడుతున్న ఆశావహుల సంఖ్య పెరిగిపోతోంది. వర్గాల వారీగా తమకంటే తమకు కావాలని...సీనియర్‌ నేతలు ముందుకు వస్తున్నారు. ఏపీ, తెలంగాణ రాష్ట్రాలకు కొత్త పీసీసీ అధ్యక్షుల ఎంపికపై ఏఐసీసీ దృష్టి సారించింది. ఏపీలో ఇప్పటికే పీసీసీ అధ్యక్ష ఎంపిక నిమిత్తం ఆ రాష్ట్ర వ్యవహారాల ఇంఛార్జీ ఉమెన్‌ చాందీ నేతృత్వంలో సీనియర్‌ నేతల నుంచి అభిప్రాయాలను సేకరిస్తున్నారు.

పీసీసీ రేసులో డజను మంది

తెలంగాణలో కొత్త పీసీసీ ఎంపిక ప్రక్రియ మొదలు కానుంది. ఇందుకోసం...అభిప్రాయ సేకరణ చేసేందుకు అధిష్ఠానం ఓ ప్రతినిధిని త్వరలో రాష్ట్రానికి పంపనున్నట్లు తెలుస్తోంది. గత వారం రోజులుగా పీసీసీ అధ్యక్షుడు ఉత్తమ్‌ బెంగళూరులో వ్యక్తిగత పనిపై ఉండడం వల్ల అభిప్రాయ సేకరణ కార్యక్రమం కొంత ఆలస్యంగా కొనసాగనుంది. దాదాపు డజను మంది పీసీసీ రేసులో ఉన్నారు. సామాజిక వర్గాల వారీగా చూస్తే... రెడ్డి సామాజిక వర్గం నుంచి ఎక్కువ మంది పోటీ పడుతున్నారు. మల్కాజిగిరి ఎంపీ రేవంత్‌ రెడ్డి, భువనగిరి ఎంపీ కోమటిరెడ్డి వెంకట్​రెడ్డి, మాజీ మంత్రులు జానారెడ్డి, జీవన్‌ రెడ్డి, ఎమ్మెల్యే జగ్గారెడ్డి కోరుకుంటున్నారు.

తాజా రాజకీయ పరిస్థితులే ప్రామాణికం

ఎస్సీ సామాజిక వర్గం నుంచి మాజీ ఉప ముఖ్యమంత్రి దామోదర్‌ రాజనరసింహ, ఏఐసీసీ కార్యదర్శి సంపత్‌కుమార్‌... పీసీసీ అధ్యక్ష పదవి కావాలని అధిష్ఠానాన్ని అడుగుతున్నారు. బీసీ సామాజిక వర్గం నుంచి మాజీ పీసీసీ అధ్యక్షుడు పొన్నాల లక్ష్మయ్య, వి.హనుమంతరావు ఆశిస్తున్నారు. జనరల్‌ కోటా నుంచి ఎమ్మెల్యే శ్రీధర్‌బాబు, మైనార్టీ సామాజిక వర్గం నుంచి మాజీ మంత్రి షబ్బీర్‌ అలీ పీసీసీ అధ్యక్ష పదవిని కోరుకుంటున్నారు. అయితే పోటీ అధికంగా ఉండడం వల్ల... ఎంపిక విషయంలో తాజా రాజకీయ పరిస్థితులను ప్రామాణికంగా ఏఐసీసీ తీసుకుంటుందని పార్టీ వర్గాలు పేర్కొన్నాయి.

పార్టీ బలోపేతమే ధ్యేయం

వరుస పరాజయాలతో చతికిల పడిన కాంగ్రెస్‌ పార్టీలో జవసత్వాలను నింపడం, పార్టీ శ్రేణుల్లో ఉత్సాహాన్ని తీసుకురావడం ప్రధానాంశాలుగా ఏఐసీసీ పరిగణనలోకి తీసుకోనుంది. అధికార తెరాస లోపాలను ఎత్తి చూపించి పార్టీని బలోపేతం చేయగలిగే నాయకుడిని పీసీసీకి ఎంపిక చేయాలని ఏఐసీసీ యోచిస్తోంది.

ఇవీ చూడండి: 'న్యాయంవైపు నిలబడితే... విపక్షాలపై విషం కక్కుతున్నారు'