'నా భార్యను ఆ నరకం నుంచి భారత్​కు రప్పించండి'

గల్ఫ్ దేశమైన మస్కట్​లో ఏపీలోని పశ్చిమ గోదావరి జిల్లాకు చెందిన ఓ మహిళ నరకం అనుభవిస్తోంది. కుటుంబానికి ఆర్థికంగా అండగా ఉందామని పరాయి దేశం వెళ్లిన ఆ మహిళ... చిత్రహింసలు అనుభవిస్తోంది. కనీసం భోజనం కూడా పెట్టకుండా లైంగికంగా వేధించేవారని బాధితురాలు ఓ వీడియోలో పేర్కొంది. తన భార్యను అక్కడి నుంచి భారత్​కు తిరిగి రప్పించాలని ఆమె భర్త కోరుతున్నాడు.

ఆంధ్రప్రదేశ్​లోని పశ్చిమగోదావరి జిల్లా ఉండి మండలం పెద్దపేటకు చెందిన ఓ మహిళకు... ఉద్యోగం ఇప్పిస్తానని చెప్పి అదే ప్రాంతానికి చెందిన ఓ ఏజెంట్ గతేడాది గల్ఫ్​కు పంపాడు. ఉపాధి కోసం వెళుతున్న ఆమెను... 2019 జులై 2న దిల్లీ వరకు వెళ్లి విమానమెక్కించాడు భర్త. మొదట కువైట్ అని చెప్పి ఆ తరువాత సదరు మహిళను దుబాయ్​కు పంపించాడు ఆ ఏజెంట్. మరికొందరితో కలిసి అక్కడ ఓ దుబాయ్ సేఠ్​కు ఆమెను విక్రయించాలని చూశాడు. ఆమె ఒప్పుకోని కారణంగా తీవ్రంగా హింసించారు. కొన్ని రోజుల తరువాత ఉపాధి కల్పిస్తామని చెప్పి ఆమెను ఆ దేశంలోని ఏజెంట్లు మస్కట్​కు​ పంపారు.

అక్కడా చిత్ర హింసలు

మస్కట్​లో ఓ వృద్ధుడి ఇంటికి బాధితురాలిని పంపగా అక్కడ ఆమెకు వేధింపులు మరింత ఎక్కువయ్యాయి. ఆ వృద్ధుడు తన పట్ల సైకోలా ప్రవర్తించేవాడని... బాధితురాలు తమ బంధువులకు పంపిన వీడియోలో తెలిపింది. భోజనం పెట్టకుండా లైంగికంగా వేధించేవాడని తమ కుమారులతో కొరికించేవాడని ఆవేదన వ్యక్తం చేసింది. అక్కడ కొన్ని రోజుల పాటు కష్టాలు అనుభవించిన ఆ మహిళ... ఓ పాస్టర్ సాయంతో తప్పించుకుని మస్కట్​లోని భారత ఎంబసీకి చేరుకుంది. నాలుగు నెలలుగా అక్కడే ఉంటోంది. ఆమె పాస్​పోర్టును ఏజెంట్లు తీసుకున్న కారణంగా.. భారత్​కు తిరిగి రాలేక అక్కడే ఆశ్రయం పొందుతోంది. ఎంబసీలో ఉన్నప్పటికీ సరైన ఆహారం లేక అవస్థలు పడుతోంది.

సాయం చేయండి

నరకం లాంటి ఆ దేశంలో ఎన్నో ఇబ్బందులు పడుతున్న ఆమెను తిరిగి భారత్​కు రప్పించాలని బాధితురాలి భర్త, ఆమె తల్లి కోరుతున్నారు. ఏజెంట్లు ఉద్యోగాల పేరుతో భీమవరం, వీరవాసరం తదితర ప్రాంతాలకు చెందిన ఎంతో మంది మహిళలను మోసం చేశారని ఆరోపిస్తున్నారు. తన భార్యతో పాటు మిగిలిన వాళ్లనూ స్వదేశానికి రప్పించాలని కోరుతున్నాడు.

ఇదీ చదవండి: పక్కా ప్రణాళిక.. 8 నెలలు.. 121 ఇళ్లు..!