ఒలింపిక్స్లో రెండు సార్లు పతకాలు సాధించి.. మరోసారి విశ్వ క్రీడల్లో సత్తాచాటేందుకు సిద్ధమవుతున్నాడు భారత స్టార్ రెజ్లర్ సుశీల్ కుమార్. 2008 బీజింగ్ ఒలింపిక్స్లో కాంస్యం... 2012 లండన్ విశ్వక్రీడల్లో రజతం కైవసం చేసుకున్నాడు. ఇవి కాకుండా 2014, 18 కామన్వెల్త్ క్రీడల్లోనూ పసిడి సొంతం చేసుకున్న ఈ స్టార్ రెజ్లర్తో ఈటీవీ భారత్ ప్రత్యేకంగా మాట్లాడింది. ఆ విశేషాలు సుశీల్ మాటల్లోనే...
అందరూ సిద్ధంగా ఉన్నారు..
భారత్లో రెజ్లింగ్.. రోజురోజుకు ఆదరణ పెరుగుతోంది. చాలామంది ఈ క్రీడపై ఆసక్తి చూపిస్తున్నారు. 2020 టోక్యో ఒలింపిక్స్ కోసం రెజ్లర్లు ఇప్పటికే సన్నాహకాలు మొదలు పెట్టేశారు. అందరూ ఇందుకోసం సిద్ధంగా ఉన్నారు.
8 ఏళ్ల తర్వాత ఆడా..
ఇటీవల ప్రపంచ రెజ్లింగ్ ఛాంపియన్షిప్లో ఆడా. ఈ టోర్నీలో 8ఏళ్ల విరామం తర్వాత పాల్గొన్నా. ఆ అనుభవం విభిన్నంగా ఉంది. అక్కడ చేసిన తప్పిదాలను నా కోచ్ గమనించాడు. అవి పునరావృతం కాకుండా కష్టపడుతున్నా. భవిష్యత్తులో ఇవి నాకు ఉపయోగపడతాయి.
తీవ్రంగా శ్రమిస్తున్నా..
ఒలింపిక్స్లో స్వర్ణం నెగ్గడమే నా లక్ష్యం. అందుకోసం తీవ్రంగా శ్రమిస్తున్నా. ఎవరు.. ఎంత సేపు ప్రాక్టీస్ చేయాలనేదానిపై నా కోచ్ ప్రణాళిక రూపొందిస్తాడు. ఆ ప్రకారం రోజుకు 45 నిమిషాల నుంచి 2 గంటల పాటు కష్టపడుతున్నా. ఆటలో యాక్టివ్గా ఉండేందుకు ఇది ఉపయోగపడుతుంది.
ఒలింపిక్స్ అర్హతలో ఫెడరేషన్దే అంతిమ నిర్ణయం..
మేరీ కోమ్, నిఖత్ జరీన్ వివాదంలో ఫెడరేషనే నిర్ణయం తీసుకుంటుంది. మీరు, నేను ఎంపిక చేసేందుకు వీలుండదు. ఎందుకంటే ఫెడరేషన్ స్వతంత్ర ప్రతిపత్తిగల సంస్థ. భారత్ తరపున ఎవరు అత్యుత్తమంగా ఆడతారు, ఎవరిని ఎంపిక చేస్తే బాగుంటుంది అనే వాటిపై ఫెడరేషన్కు అవగాహన ఉంది.
ఇదీ చదవండి: 'మేరీనే తీసుకోవాలనుకుంటే నేనెందుకు ఆడడం'
నాతో పాటు వాళ్లూ గెలుస్తారు..
2020 టోక్యో ఒలింపిక్స్లో నాతో పాటు దీపక్ పునియా, బజరంగ్ పునియా, వినీశ్ ఫొగాట్, రవి దాహియా పతకాలు సాధిస్తారని అనుకుంటున్నా.
పహిల్వాన్ అంటే నెయ్యి తినాల్సిందే..
కుస్తీలో ఫిట్గా ఉండాలంటే నెయ్యి తినాల్సిందే. నేను ఇప్పటికీ నా ఆహారంలో భాగంగా తీసుకుంటున్నా. మా గురువు బాబా రామ్దేవ్ కూడా తినమని నాకు సలహా ఇచ్చారు.
2008, 2012 క్రీడల్లో 66 కేజీల విభాగంలో తలపడిన సుశీల్ కుమార్ అనంతరం 74 కేజీలకు మారాడు. 2016 రియో ఒలింపిక్స్లో ఆడకపోవడానికి ఇది కూడా ఓ కారణం. ఆ విభాగంలో ఇంతకుముందే ఉన్న నర్సింగ్ యాదవ్ పోటీకి సిద్ధంగా ఉండగా.. కోర్టు ఆదేశంతో రియో ఒలింపిక్స్కు దూరమయ్యాడు సుశీల్.
ఇదీ చదవండి: ఫెదరర్ కొత్త రికార్డ్... ఈ సీజన్లో హాఫ్ సెంచరీ
