బీసీసీఐపై.. పాకిస్థాన్ క్రికెట్ బోర్డు (పీసీబీ) మళ్లీ బెదిరింపులకు పాల్పడింది. సెప్టెంబర్లో తాము నిర్వహించే ఆసియాకప్‌ టీ20 టోర్నీ ఆడాలని హెచ్చరించింది. లేదంటే 2021లో భారత్ ఆతిథ్యమిచ్చే టీ20 ప్రపంచకప్‌నకు తమ జట్టును పంపించబోమని చెప్పింది. తాజాగా ఈ మేరకు ప్రకటన చేశాడు పాకిస్థాన్ క్రికెట్ బోర్డు(పీసీబీ) సీఈఓ వసీం ఖాన్. అంతేకాకుండా బంగ్లాదేశ్ జట్టు.. పాక్లో పర్యటిస్తే ఆసియా కప్ ఆతిథ్య హక్కులను బదిలీ చేస్తారని వచ్చిన వార్తలను వసీం ఖండించాడు.
" ఆసియాకప్‌ కోసం భారత్ రాకుంటే మేం అక్కడ జరిగే 2021 టీ20 ప్రపంచకప్లో పాల్గొనలేం. ఆసియా క్రికెట్ కౌన్సిల్‌(ఏసీసీ) మాకు ఆసియా కప్ ఆతిథ్య హక్కుల్ని ఇచ్చింది. వాటిని మేం ఎవరికీ ఇవ్వం. ఆ అధికారం మాకు లేదు. 2023-2031 మధ్యలో కనీసం మూడు ఐసీసీ టోర్నీల ఆతిథ్య హక్కులు పొందేందుకు ప్రయత్నిస్తాం"
-- వసీం ఖాన్, పాకిస్థాన్ క్రికెట్ బోర్డు సీఈఓ
2008 నుంచి పాక్లో పర్యటించలేదు భారత జట్టు. 2012లో పాకిస్థాన్ మాత్రం మనదేశంలో టీ20 సిరీస్ ఆడింది. ఉగ్రవాదం నిర్మూలించేంత వరకు ఆ దేశంతో ఆడేందుకు జట్టును అనుమతించమని కేంద్ర ప్రభుత్వం గతంలో ప్రకటించింది. అందుకే ఐసీసీ టోర్నీల్లో మాత్రమే దాయాది దేశాలు తలపడుతున్నాయి. శ్రీలంక జట్టు బస్సుపై లాహోర్‌లో పదేళ్ల క్రితం ఉగ్రదాడి జరిగింది. ఆ తర్వాత ఏ దేశమూ దాయాది గడ్డపై అడుగుపెట్టలేదు. 2019లో లంకేయులే మళ్లీ అక్కడ మ్యాచ్లు ఆడారు.
