'పదేళ్లయినా.. చేదు జ్ఞాపకాలు వెంటాడుతూనే ఉన్నాయి'

లాహోర్​లో శ్రీలంక ఆటగాళ్లపై జరిగిన ఉగ్రదాడికి పదేళ్లయినా.. ఇంకా ఆ చేదు జ్ఞాపకాలు వెంటాడుతూనే ఉన్నాయని ఐసీసీ మాజీ అంపైర్ సైమన్ టాఫెల్ తన పుస్తకంలో ప్రస్తావించారు. పెద్ద పెద్ద ధ్వనులు వింటే ఆందోళనగా ఉంటుందని చెప్పారు.

దశాబ్దం తర్వాత పాకిస్థాన్​లో టెస్టు సిరీస్ ఆడనుంది శ్రీలంక. ఈ నేపథ్యంలో 2009 లాహోర్ ఉగ్రదాడిని గుర్తుచేసుకున్నారు ఐసీసీ మాజీ అంపైర్ సైమన్ టాఫెల్. ఆ ఘటన ఇప్పటికీ తన కళ్ల ముందు మెదలాడుతూనే ఉందని తన పుస్తకం 'ఫైండింగ్ ద గ్యాప్స్'​లో ప్రస్తావించారు.

"ఆ రోజు నుంచి ఇప్పటివరకు పెద్ద ధ్వనులు విన్న ప్రతిసారీ ఆందోళనగా ఉంటుంది. ఈ పరిస్థితి నుంచి కోలుకునేందుకు సమయం పడుతుంది. తుపాకీ లేదా అలాంటి సౌండ్లు విన్నప్పుడు ఈ రోజుకూ అసౌకర్యంగా ఉంటుంది. ఆ చేదు జ్ఞాపకాలు వెంటాడుతూనే ఉన్నాయి." -సైమన్ టాఫెల్.

ఆ సిరీస్​లో అంపైర్లుగా వ్యవహరించిన నలుగురిలో టాఫెల్ ఒకరు. ఉగ్రదాడిలో శ్రీలంక ఆటగాళ్లు సంగక్కర, మెండిస్, సమరవీర గాయపడ్డారు.

పదేళ్లు తర్వాత పాకిస్థాన్​ గడ్డపై ఆ జట్టుతో టెస్టు సిరీస్ ఆడబోతుంది శ్రీలంక. వచ్చే నెల 11 నుంచి సిరీస్ ప్రారంభం కానుంది. తొలి టెస్టు రావల్పిండి వేదికగా జరగనుంది. మూడు రోజుల ముందుగానే లంక జట్టు పాకిస్థాన్​కు బయలదేరనుంది.

శ్రీలంక టెస్టు జట్టు:

దిముత్ కరుణరత్నే(కెప్టెన్), ఒషాడా ఫెర్నాండో, కుశాల్ మెండిస్, ఏంజెలో మ్యాథ్యూస్, దినేశ్ చండిమల్, కుశాల్ పెరీరా, లాహిరు తిరిమన్నె, ధనంజయ డిసిల్వా, డిక్​వెల్లా, దిలుర్వాన్ పెరీరా, లసిత్ ఎంబుల్డెనియా, సురంగ లక్మల్, లాహిరు కుమారా, విశ్వా ఫెర్నాండో, కసున్ రజిత, లక్షన్ సండకన్.

ఇదీ చదవండి: వైరల్​: లగాన్ షాటేనా.. కాదు.. శివసేన స్కూప్ షాట్​!