పాకిస్థాన్ బౌలర్ యాసిర్ షా... ఓ చెత్త రికార్డు మూటగట్టుకున్నాడు. గబ్బా వేదికగా ఆస్ట్రేలియాతో జరుగుతోన్న తొలి టెస్టులో 4 వికెట్లు తీసి.. 205 పరుగులు సమర్పించుకున్నాడు. 33 ఏళ్ల ఈ క్రికెటర్ ఒక టెస్టు ఇన్నింగ్స్లో 200 పరుగులు పైగా ఇచ్చిన ఆటగాడిగా రికార్డు సృష్టించాడు. ఇతడు ఇంత భారీ స్కోరు ఇవ్వడం ఇది మూడోసారి.
గతంలో...
యాసిర్.. గతంలోనూ భారీగానే పరుగులు ఇచ్చుకున్నాడు. మెల్బోర్న్ వేదికగా 2016 ఆస్ట్రేలియాతో జరిగిన ఓ టెస్టులో 41 ఓవర్లు వేసి 207 రన్స్ ఇచ్చాడు. ఆ మ్యాచ్లో మూడు వికెట్లు తీశాడు. ఆ తర్వాత 2016లో ఓల్డ్ ట్రాఫోర్డ్ మైదానంలో ఇంగ్లాండ్తో జరిగిన ఓ మ్యాచ్లో.. 54 ఓవర్లు వేసి 213 పరుగులు ఇచ్చాడు. ఈ మ్యాచ్లో కేవలం ఒక్క వికెట్ తీశాడు.
ఓటమి దిశగా పాక్...
ప్రస్తుతం ఆస్ట్రేలియాతో జరుగుతున్న తొలి టెస్టులో పాకిస్థాన్ ఓటమి దిశగా సాగుతోంది. తొలి ఇన్నింగ్స్లో ఆసీస్ 580 పరుగుల భారీ స్కోరు సాధించింది. భారీ లక్ష్య ఛేదనలో పాకిస్థాన్ 240 రన్స్కే ఆలౌటయింది. రెండో ఇన్నింగ్స్లో ఫాలోఆన్ ఆడిన పాక్ 17 ఓవర్లలో 64 పరుగులకే మూడు వికెట్లు కోల్పోయింది. బాబర్ అజామ్(20), షాన్ మసూద్(27) క్రీజులో ఉన్నారు. ఇంకా 276 పరుగులు వెనుకంజలో ఉంది పాక్.
ఆసీస్ తొలి ఇన్నింగ్స్లో ఆ జట్టు ఓపెనర్‌ డేవిడ్‌ వార్నర్‌ (154; 296 బంతుల్లో 10ఫోర్లు) అద్భుత శతకం సాధించాడు. వన్‌డౌన్‌లో వచ్చిన లబుషేన్‌(185; 279 బంతుల్లో 6ఫోర్లు) రాణించాడు. వీరిద్దరికీ తోడు జో బర్న్స్(97), మాథ్యూ వేడ్(60) ధాటికి 580 పరుగులు చేసి ఆలౌట్ అయింది కంగారూ జట్టు.
స్మిత్ను ఏడుసార్లు...
ఈ మ్యాచ్లో పాకిస్థాన్ లెగ్ స్పిన్నర్ యాసిర్ షా 205 పరుగులు ఇచ్చుకుని... జో బర్న్స్, స్టీవ్ స్మిత్, మిచెల్ స్టార్క్, హజిల్వుడ్ వికెట్లు తీశాడు. ఆసీస్-పాక్ తలపడిన ఆరు మ్యాచ్ల్లో ఈ ఆటగాడు బరిలోకి దిగి.. కంగారూ జట్టు ఆటగాడు స్మిత్ను ఏడు సార్లు ఔట్ చేయడం విశేషం.
