భారత స్టార్ బౌలర్ జస్ప్రీత్ బుమ్రా.. నాలుగు నెలల విరామం తర్వాత ఇటీవలె మళ్లీ అంతర్జాతీయ మ్యాచ్ ఆడాడు. ఇండోర్ వేదికగా లంకతో జరిగిన మ్యాచ్లో బరిలోకి దిగాడు. ఈ మ్యాచ్లో ఒక్క వికెట్ మాత్రమే తీసిన బుమ్రా.. పరుగులు కట్టడి చేయడంలో కాస్త విఫలమయ్యాడు. డెత్ ఓవర్లలో స్పెషలిస్ట్ అయిన ఈ పేసర్.. ఆఖరి ఓవర్లో చివరి మూడు బంతులకు 3 ఫోర్లు సమర్పించుకున్నాడు. మళ్లీ లయ అందుకుని ప్రత్యర్థికి వణుకు పుట్టించాలని ప్రాక్టీస్లో భారీగా శ్రమిస్తున్నాడు. బౌలింగ్ కోచ్ భరత్ అరుణ్ ఇతడిపై ఎక్కువ దృష్టి పెడుతున్నాడు. అయితే శుక్రవారం మూడో టీ20 ముంగిట బుమ్రాను మరో రికార్డు ఊరిస్తోంది.
ఒక్క వికెట్ దూరంలో...
టీ20ల్లో అత్యధిక వికెట్లు తీసిన భారత బౌలర్గా నిలిచేందుకు వికెట్ దూరంలో ఉన్నాడు బుమ్రా. ప్రస్తుతం అశ్విన్, చాహల్‌తో కలిసి సంయుక్తంగా అగ్రస్థానంలో కొనసాగుతున్నాడు. ముగ్గురూ 52 వికెట్లు సాధించారు. గత మ్యాచ్లో జట్టుతోనే దాదాపు మార్పులు లేకుండా బరిలోకి దిగనుంది టీమిండియా. ఇదే జరిగితే చాహల్కు ఈ రికార్డు అందుకునే వీలుండదు. లేదంటే బుమ్రా, చాహల్ మధ్య పోటీ ఉంటుంది.
అశ్విన్ 46 టీ20 మ్యాచ్‌ల్లో 52 వికెట్లు సాధించగా... బుమ్రా 44, చాహల్ 36 మ్యాచ్‌ల్లోనే ఈ ఫీట్‌ అందుకున్నారు.
ప్రస్తుతం మూడు టీ20ల సిరీస్ కోసం భారత్లో పర్యటిస్తోంది లంక జట్టు. ఇప్పటికే వర్షం కారణంగా తొలి మ్యాచ్ రద్దవగా.. రెండో మ్యాచ్లో 7 వికెట్ల తేడాతో గెలుపొందింది టీమిండియా. ఫలితంగా 1-0 ఆధిక్యంలో ఉంది. పుణె వేదికగా శుక్రవారం జరగనున్న ఆఖరి మ్యాచ్లో లంకేయులను ఓడించి ట్రోఫీ గెలవాలని చూస్తోంది కోహ్లీసేన.
