స్లెడ్జింగ్(ప్రత్యర్థి క్రికెటర్లను రెచ్చగొట్టేలా మాట్లాడటం) విషయంలో ఇతర దేశాలతో పోలిస్తే ఆస్ట్రేలియా క్రికెటర్లు ముందుంటారు. ప్రత్యర్థి ఆటగాళ్లను రెచ్చగొట్టేలా మాట్లాడి, మ్యాచ్లో ఫలితం పొందుదామని చూస్తుంటారు. అయితే అనిల్ కుంబ్లేను వాళ్లు స్లెడ్జింగ్ చేయలేదట. అందుకు కారణం ఆసీస్ మాజీ స్పిన్నర్ షేన్ వార్న్ తన స్నేహితుడు కావడమేనని ఇటీవలే జరిగిన ఓ ఇంటర్వ్యూలో కుంబ్లే చెప్పాడు.
"మీకు షేన్ వార్న్ మిత్రుడైతే.. ఆస్ట్రేలియా ఆటగాళ్లు మిమ్మల్ని స్లెడ్జింగ్ చేయరు. వార్న్.. నేనూ మంచి స్నేహితులం. కాబట్టి నన్ను ఎవరూ రెచ్చగొట్టేలా ప్రవర్తించలేదు" -అనిల్ కుంబ్లే, భారత మాజీ క్రికెటర్.
ఆస్ట్రేలియా జట్టుకు బౌలింగ్ చేయడాన్ని తను ఆస్వాదిస్తానని అన్నాడు కుంబ్లే.
"బౌలర్గా ప్రతి ఒక్కరికీ బౌలింగ్ చేయాలి. కానీ ఆస్ట్రేలియా జట్టుకు బౌలింగ్ చేయడం ఛాలెంజింగ్గా ఉంటుంది. ఆ రోజుల్లో అంతర్జాతీయ క్రికెట్లో వారిది అత్యుత్తమ జట్టు. ఆసీస్పై సత్తాచాటితే గర్వంగా అనిపిస్తుంది. వారికి బౌలింగ్ చేయడాన్ని ఆస్వాదిస్తా. చాలా సార్లు అత్యుత్తమ ప్రదర్శన చేశా " - అనిల్ కుంబ్లే, భారత మాజీ క్రికెటర్.
132 టెస్టులాడిన అనిల్ కుంబ్లే.. 619 వికెట్లు తీశాడు. 2008లో ఆస్ట్రేలియాతో చివరి టెస్టు మ్యాచ్ ఆడి రిటైర్మెంట్ ప్రకటించాడు.
ఇదీ చదవండి: గేల్ ఫన్నీ అప్పీల్.. అంపైర్ ముసి ముసి నవ్వుల్..!
