దూకుడుగా బ్యాటింగ్ చేసే టీమిండియా కెప్టెన్ విరాట్ కోహ్లీ.. ఎదుటివారు కవ్విస్తే అంతే చురుకుగా కౌంటర్ ఇస్తాడు. విశాఖపట్నంలో వెస్టిండీస్తో జరిగిన రెండో వన్డేలో అతడు వ్యవహరించిన తీరుపై కరీబియన్ కెప్టెన్ కీరన్ పొలార్డ్ స్పందించాడు. విరాట్ ఎందుకు అంత అతిగా స్పందిస్తాడో అర్ధం కావట్లేదని అన్నాడు.
"విరాట్ ఎందుకు అంత అత్యుత్సాహం ప్రదర్శిస్తాడో అతడిని మీరు అడగండి. ఈ ప్రశ్నకు సమాధానం నేను చెప్పలేను. ఈ అంశం గురించి నాకేమి తెలియదు" - కీరన్ పొలార్డ్, విండీస్ కెప్టెన్.
ఇటీవలే టీ20 సిరీస్లో విండీస్ ఆటగాడు విలియమ్సను నోట్బుక్ టిక్తో అనుకరించాడు కోహ్లీ. తొలివన్డేలో రవీంద్ర జడేజా రనౌట్పై అంపైర్పై అసంతృప్తి వ్యక్తం చేశాడు. రెండో వన్డేలో పొలార్డ్ డకౌట్ కావడం వల్ల అత్యుత్సాహంతో ముందుకెళ్లాడు.
ఈ మ్యాచ్లో భారత్ ఇన్నింగ్స్లోని చివరి పది ఓవర్లే తమ ఓటమికి కారణమని అన్నాడు పొలార్డ్.
"388 పరుగుల లక్ష్యాన్ని ఛేదించేందు శతవిధాల ప్రయత్నించాం. అయితే భారత్ ఇన్నింగ్స్లో చివరి పది ఓవర్లే మా గేమ్ను మార్చాయి. 127 పరుగులు సమర్పించాం. అక్కడే మేం ఓడాం. అంతకుముందు వరకు మ్యాచ్ మాకు అనుకూలంగానే ఉంది" - కీరన్ పొలార్డ్
వెస్టిండీస్తో రెండో వన్డేలో భారత్.. 107 పరుగుల తేడాతో గెలిచింది. రోహిత్ శర్మ, కేఎల్ రాహుల్ శతకాలతో విధ్వంసం సృష్టించారు. మూడు వన్డేల సిరీస్ 1-1తో సమమైంది. నిర్ణయాత్మక మూడో మ్యాచ్ ఈనెల 22న కటక్ వేదికగా జరగనుంది.
ఇదీ చదవండి: విశాఖలో రోహిత్ సునామీ.. మ్యాచ్ గ్యాలరీ
