హీరో హీరోయిన్లకు కెమిస్ట్రీ ఎంత అవసరమో.. హీరోయిన్తో దర్శకులకు అంతే పరస్పర అవగాహన ఉండాలి. లేదంటే సినిమా ఫ్లాప్ అయ్యే ప్రమాదం ఉంది. అందుకే తాము తెరకెక్కించబోయే చిత్రాల్లో కొత్త వారికి బదులుగా, అంతకు ముందు తమతో పనిచేసిన వారినే నటింపజేస్తున్నారు. ఈ జాబితాలో త్రివిక్రమ్, హరీశ్ శంకర్, సురేందర్రెడ్డి వంటి టాప్ డైరక్టర్లు ఉన్నారు. వారి గురించే ఈ ప్రత్యేక కథనం.
త్రివిక్రమ్-పూజా హెగ్డే
గత కొద్ది కాలంలో త్రివిక్రమ్ తీస్తున్న సినిమాలు చూస్తే మీకు ఈ విషయం అర్థమవుతుంది. ప్రస్తుతం 'అల వైకుంఠపురములో' అనే సినిమాను తెరకెక్కిస్తున్నాడీ దర్శకుడు. ఇందులో నటిస్తున్న హీరోయిన్ పూజాహెగ్డే.. 'అరవింద సమేత' కోసం ఇదే డైరక్టర్తో కలిసి పనిచేసింది. ఇంతకు ముందు హీరోయిన్ సమంత.. త్రివిక్రమ్ రూపొందించిన మూడు చిత్రాల్లో(అత్తారింటికి దారేది, సన్నాఫ్ సత్యమూర్తి, అఆ) హీరోయిన్గా కనిపించింది.
హరీశ్ శంకర్-పూజా హెగ్డే
ఇటీవలే 'గద్దలకొండ గణేష్'తో ప్రేక్షకులను ఆకట్టుకున్నాడు దర్శకుడు హరీశ్ శంకర్. ఇందులో హీరోయిన్గా నటించింది పూజా హెగ్డే. ఈ డైరక్టర్ తెరకెక్కించిన గత చిత్రం 'దువ్వాడ జగన్నాథమ్' ఈమెనే కథానాయిక. ఇంతకు ముందు 'గబ్బర్సింగ్', 'రామయ్యా వస్తావయ్యా' సినిమాల్లో శ్రుతిహాసన్ హీరోయిన్గా కనిపించింది.
సురేందర్ రెడ్డి-తమన్నా
మెగాస్టార్ చిరంజీవితో 'సైరా' తీసే అవకాశం దక్కించుకున్నాడు సురేందర్ రెడ్డి. ఈ సినిమాలో ఓ హీరోయిన్గా నటించిన తమన్నా.. అద్భుత నటనతో ఆకట్టుకుంది. ఇంతకు ముందు ఇదే దర్శకుడితో 'ఊసరవెల్లి' చిత్రం కోసం కలిసి పనిచేసింది. ఈ డైరక్టర్తో రకుల్ ప్రీత్ సింగ్ వరుసగా రెండు సినిమాలు(కిక్ 2, ధృవ) చేసింది.
శేఖర్ కమ్ముల-సాయిపల్లవి
చాలా ఏళ్ల తర్వాత 'ఫిదా'(2017)తో హిట్ కొట్టాడు దర్శకుడు శేఖర్ కమ్ముల. కాస్త విరామం తీసుకుని హీరో నాగచైతన్యతో సినిమా రూపొందిస్తున్నాడు. ఈ రెండు చిత్రాల్లోనూ హీరోయిన్ సాయిపల్లవినే. హీరోయిన్ కమలినీ ముఖర్జీ ఈ డైరక్టర్తో వరుసగా మూడు సినిమా(ఆనంద్, గోదావరి, హ్యాపీడేస్)ల్లో నటించింది.
సంపత్ నంది-తమన్నా
ఈ దర్శకుడు ప్రస్తుతం హీరో గోపీచంద్తో సినిమా తీస్తున్నాడు. ఇందులో హీరోయిన్గా తమన్నా నటిస్తోంది. ఈ డైరక్టర్తో ఈమె పనిచేయడం ఇది మూడోసారి. ఇంతకు ముందు వీరిద్దరి కాంబినేషన్లో 'రచ్చ', 'బెంగాల్ టైగర్' అనే సినిమాలు వచ్చాయి.
వెంకీ కుడుముల-రష్మిక
తొలి సినిమా 'ఛలో'తోనే గుర్తింపు తెచ్చుకున్నాడు వెంకీ కుడుముల. అందులో హీరోయిన్ నటించిన రష్మికనే.. తన రెండో సినిమా కోసం ఎంపిక చేసుకున్నాడు. నితిన్ హీరోగా నటిస్తున్న ఈ చిత్రం ప్రస్తుతం షూటింగ్ జరుపుకుంటోంది.
