బాలీవుడ్ స్టార్ సల్మాన్ ఖాన్ పెళ్లి విషయంపై అభిమానుల్లోనే కాదు.. చిత్ర పరిశ్రమలోనూ ఎంతో ఆసక్తి. అయితే సల్మాన్ 1999లోనే వివాహం చేసుకోవాలనుకున్నాడట.. చివరి క్షణంలో తన ఆలోచన మార్చుకున్నాడట. ఈ విషయాన్ని భాయ్ స్నేహితుడు, ప్రముఖ నిర్మాత సాజిద్ నడియావాలా ఓ షోలో చెప్పాడు.
"1999లో సల్మాన్ ముందు పెళ్లి ప్రతిపాదన వచ్చింది. అతడికోసం అమ్మాయీ సిద్ధంగా ఉంది. భాయ్ తండ్రి సలీమ్ ఖాన్ పుట్టినరోజైన నవంబరు 18న సల్మాన్, నేను ఒకేసారి పెళ్లి చేసుకోవాలనుకున్నాం. శుభలేఖలు కూడా పంచేశాం. వివాహానికి 5, 6 రోజులు ముందు 'నాకు ఇప్పుడు ఆ మూడ్ లేదు' అని చెప్పి కారెక్కి వెళ్లిపోయాడు. ఆ విధంగా సల్మాన్ పెళ్లి పెటాకులైంది" -సాజిద్ నడియావాలా, బాలీవుడ్ నిర్మాత.
అయితే సల్మాన్ ఎవరిని చేసుకోవాలనుకున్నాడో.. ఆమె పేరును బహిర్గతపరచలేదు సాజిద్. అంతకుముందు బాలీవుడ్ నటి సంగీత బిల్జానితో చాలా ఏళ్లపాటు డేటింగ్ చేశాడు సల్మాన్. వీరిద్దరు పెళ్లి చేసుకుంటారని కూడా అప్పట్లో వార్తలు వచ్చాయి.
తన పెళ్లి రద్దు విషయాన్ని గతంలో కాఫీ విత్ కరణ్ షోలో చెప్పాడు సల్మాన్.
"నేను వేరొకరితో ఉన్నప్పుడు నా గర్ల్ఫ్రెండ్కు అడ్డంగా దొరికా. ఈ విధంగా నా పెళ్లి రద్దయింది. ఎలాంటి బంధాన్నైన ముందుకు తీసుకెళ్లేందుకు ఇప్పటికీ సిద్ధంగా లేను." -సల్మాన్ ఖాన్
సల్మాన్ పెళ్లి గురించి తెలుసుకోవాలని అభిమానులూ ఆత్రుతతో ఎదురుచూస్తుంటారు. అతడు కత్రినా కైఫ్తో కొన్ని రోజులు డేటింగ్ చేశాడు. ప్రస్తుతం రొమేనియన్ మోడల్ లులియా వంతూర్తో ప్రేమలో ఉన్నట్లు ఊహాగానాలు వస్తున్నాయి. భాయ్ నటించిన దబంగ్-3 చిత్రం డిసెంబర్ 25న విడుదల కానుంది.
ఇదీ చదవండి: 'విజిల్' మహిళలకు అంకితం-అట్లీ
