టాలీవుడ్ రౌడీ హీరో విజయ్ దేవరకొండ - పూరి జగన్నాథ్ల కలయికలో రాబోతున్న పాన్‌ ఇండియా చిత్రంపై ఇప్పటికే భారీ అంచనాలు నెలకొని ఉన్నాయి. దీనికి 'ఫైటర్‌' పేరును పరిశీలిస్తోంది చిత్రబృందం. ఈ చిత్ర నిర్మాణం కోసం ప్రముఖ బాలీవుడ్‌ నిర్మాత కరణ్‌ జోహార్‌ పూరితో చేతులు కలిపాడని సమాచారం అందడం వల్ల ఈ మూవీపై అంచనాలు మరింత రెట్టింపయ్యాయి. ఇంకా సెట్స్‌పైకి వెళ్లకుండానే ఇంతటి క్రేజ్‌ దక్కించుకున్న ఈ ప్రాజెక్టులోకి ప్రేక్షకుల అంచనాలకు తగ్గట్లుగానే భారీ తారాగణాన్ని రంగంలోకి దించబోతున్నాడట పూరి.
ఇప్పటికే ఈ చిత్రంలో దేవరకొండకు జోడీగా జాన్వీ కపూర్‌ను నటింపజేయనున్నట్లు వార్తలొస్తున్నాయి. జాన్వీ ఈ సినిమాకు దాదాపుగా ఓకే చెప్పేసిందని, ఈ మూవీ కోసం ఆమె రూ.3.5కోట్ల పారితోషికం పుచ్చుకోబోతున్నట్లు తెలిసింది. ఇప్పుడీ చిత్రలో రౌడీ హీరో తల్లి పాత్ర కోసం రమ్యకృష్ణను తీసుకోబోతున్నట్లు సినీ వర్గాల నుంచి సమాచారం అందుతోంది. 'బాహుబలి' చిత్రంలోని శివగామి పాత్రతో రమ్యకు జాతీయ స్థాయిలో క్రేజ్‌ ఏర్పడింది. దీన్ని దృష్టిలో పెట్టుకునే ఈ సినిమాలో దేవరకొండకు తల్లిగా ఆమెను తీసుకుంటే చిత్రానికి మరింత కలిసొచ్చే అవకాశముందని భావించాడట పూరి. ఇప్పటికే ఈ పాత్ర విషయమై చర్చలు ముగిశాయని, రౌడీకి తల్లిగా కనిపించేందుకు శివగామి ఒప్పుకుందని గుసగుసలు వినిపిస్తున్నాయి. త్వరలోనే దీనిపై అధికారిక ప్రకటన వెలువడనున్నట్లు సమాచారం.
ప్రస్తుతం విజయ్ 'వరల్డ్‌ ఫేమస్‌ లవర్‌' చిత్రంతో బిజీగా ఉన్నాడు. క్రాంతిమాధవ్‌ దర్శకత్వంలో రూపొందుతోన్న ఈ సినిమా ప్రేమికుల దినోత్సవ కానుకగా ఫిబ్రవరి 14న ప్రేక్షకుల ముందుకు రాబోతుంది.
ఇవీ చూడండి.. పవన్ కల్యాణ్, ప్రభాస్ అంటే ఇష్టం: దబంగ్ హీరోయిన్
