'బాహుబలి', 'సాహో'లతో జాతీయ స్థాయిలో గుర్తింపు పొందిన హీరో ప్రభాస్. అలాంటిది ఇప్పుడు తను నటించే కొత్త చిత్రం 'జాన్'ను బాలీవుడ్ ప్రేక్షకులు చూసే అవకాశం లేదట.
కారణమిదేనా?
ఎస్.ఎస్.రాజమౌళి దర్శకత్వంలో వచ్చిన 'బాహుబలి' సిరీస్.. ప్రభాస్ మార్కెట్ను అమాంతం పెంచేసింది. అందుకు తగ్గట్లుగానే 'సాహో'లో శ్రద్ధాకపూర్, నీల్‌ నితిన్‌ ముఖేష్‌ తదితర బాలీవుడ్ నటీనటులు కీలక పాత్రల్లో కనిపించారు. ఆ సినిమా హిందీలో ఆశించినంత ఫలితం అందుకోలేదు. అందుకే 'జాన్'ను అక్కడ విడుదల చేసేందుకు విముఖత చూపుతున్నారట.
రొమాంటిక్‌ ప్రేమకథా నేపథ్యంలో వస్తున్న 'జాన్'లో పూజా హెగ్డే హీరోయిన్. అమిత్‌ త్రివేది సంగీతం అందిస్తున్నాడు. కె.కె.రాధాకృష్ణ దర్శకత్వం వహిస్తున్నాడు. ప్రస్తుతం హైదరాబాద్లో షూటింగ్ జరుపుకుంటోంది.
