ఇంకా సెట్స్‌పైకి వెళ్లనే లేదు కానీ, పూరి జగన్నాథ్ - విజయ్ దేవరకొండల క్రేజీ ప్రాజెక్ట్‌ 'ఫైటర్'పై అంచనాలు అంతకంతకూ పెరుగుతున్నాయి. కిక్‌ బాక్సింగ్‌ కథతో రూపొందనున్న ఈ చిత్రంలో విజయ్ ఓ ప్రొఫెషనల్‌ బాక్సర్‌గా కనిపించబోతున్నాడు. ఇందులో దేవరకొండకు జోడీగా జాన్వీ కపూర్‌ కనిపించబోతుందని, తల్లి పాత్రను రమ్యకృష్ణ చేయబోతున్నట్లు ఇప్పటికే వార్తలొస్తున్నాయి. తాజాగా ఈ చిత్ర ప్రధాన ప్రతినాయకుడి పాత్రకు 'ఆర్‌ఎక్స్‌ 100' హీరో కార్తికేయను ఎంచుకున్నట్లు గుసగుసలు వినిపిస్తున్నాయి. అయితే ఇప్పుడీ వార్తలన్నింటినీ తలదన్నే మరో పెద్ద వార్తొకటి మీడియాలో చక్కర్లు కొడుతోంది.
ఈ చిత్రంలో అంతర్జాతీయ బాక్సింగ్‌ దిగ్గజం మైక్ టైసన్ కీలక పాత్రలో కనిపించబోతున్నాడట. టైసన్ను భారతీయ తెరకు పరిచయం చేయాలని మన చిత్ర దర్శకులెవరైనా ప్రయత్నించారో లేదో తెలియదు కానీ, ఇప్పుడు పూరి మాత్రం ఆ ప్రయత్నాన్ని చేయబోతున్నట్లు మీడియాలో తెగ ప్రచారం జరుగుతోంది.
టైసన్ ఇప్పటికే పలు హాలీవుడ్‌ చిత్రాల్లో నటించి మెప్పించాడు. ఇతడి జీవితకథ ఆధారంగా తెరకెక్కిన 'టైసన్'తో పాటు 'ద హ్యాంగోవర్‌', 'చైనా సేల్స్‌మేన్‌', 'కిక్‌ బాక్సర్' తదితర సినిమాల్లో నటించాడు. ఇక భారతీయ సినిమాలపైనా టైసన్కు మక్కువ ఎక్కువే. ముఖ్యంగా బాలీవుడ్‌ కండల వీరుడు సల్మాన్‌ఖాన్‌తో ఇతడికి మంచి స్నేహ బంధం ఉంది. ఈ బాక్సర్ భారత్‌కు ఎప్పుడు వచ్చినా తనకు సంబంధించిన రక్షణ బాధ్యతలను సల్మాన్‌ సిబ్బందికే అప్పజెపుతుంటాడు.
ఇవీ చూడండి.. ఇది ఆడవాళ్లు మాత్రమే పరిష్కరించే సమస్య కాదు!
