టాలీవుడ్ హీరోగా, వ్యాపారవేత్తగా, నిర్మాతగా, పలు బ్రాండ్లకు ప్రచారకర్తగా ఇలా వివిధ రకాల పాత్రలు పోషిస్తున్నాడు సూపర్స్టార్ మహేశ్బాబు. కొంతకాలంగా తాను నటిస్తున్న సినిమాలకు నిర్మాణ భాగస్వామిగా వ్యవహరిస్తున్న మహేశ్.. అడివి శేష్ ప్రధాన పాత్రలో 'మేజర్‌' అనే బయోపిక్‌ను నిర్మిస్తున్నాడు. డిజిటల్‌ రంగంలోనూ పలు వెబ్‌ సిరీస్‌లు నిర్మించేందుకు సిద్ధమవుతున్నాడు. ఇప్పటికే థియేటర్ల రంగంలో ఉన్న మహేశ్.. తాజాగా మరో అధునాతన మల్టీప్లెక్స్ కట్టాలని భావిస్తున్నాడట.
మరో మల్టీప్లెక్స్
సినిమాకు అనుబంధ రంగమైన థియేటర్‌ వ్యాపారంలోనూ కొన్నేళ్ల క్రితమే అడుగుపెట్టాడు మహేశ్బాబు. ప్రముఖ డిస్టిబ్యూషన్‌ సంస్థ ఏషియన్‌ సినిమాస్‌తో కలిసి హైదరాబాద్‌లో 'ఏఎంబీ సినిమాస్‌' పేరుతో భారీ మల్టీప్లెక్స్‌ను ఏర్పాటు చేశాడు. ఏడు స్క్రీన్స్‌తో దాదాపు 1600 మంది కూర్చొనే సామర్థ్యంతో దీనిని నిర్మించారు. అయితే ఇప్పుడు మహేశ్బాబు ఒక్కడే.. బెంగళూరులో మరో మల్టీప్లెక్స్ కట్టాలని భావిస్తున్నాడు.
వంశీ సినిమాలో స్పై రోల్
వంశీ పైడిపల్లితో తర్వాతి సినిమా చేయనున్నాడు మహేశ్. మరో రెండు నెలల తర్వాత షూటింగ్ ప్రారంభం కానుంది. గూఢచారి పాత్రలో ఈ హీరో కనిపించనున్నాడని సమాచారం. ఇందులో ఇద్దరు హీరోయిన్లకు చోటుంది. వారి ఎంపికే ప్రస్తుతం జరుగుతోంది.
ఇదీ చదవండి: '83' సినిమాలో టీమిండియా క్రికెటర్లు వీరే
