పలు విభిన్న పాత్రల్లో నటించి, ఎందరో ప్రేక్షకులను మెప్పించి బాలీవుడ్ క్వీన్‌గా పేరు తెచ్చుకుంది నటి కంగనా రనౌత్. ఇటీవల 'రాణీ ఆఫ్‌ ఝాన్సీ' పేరుతో ఓ నిర్మాణ సంస్థను ఏర్పాటు చేసింది. ఈ నిర్మాణ సంస్థ ద్వారా ప్రేక్షకులను మెప్పించే చిత్రాలను తెరకెక్కిస్తానని కంగన తెలిపింది. తాజాగా తన నిర్మాణ సంస్థలో చేయనున్న మొదటి సినిమా గురించి వివరించింది.
'అపరాజిత అయోధ్య' పేరుతో అయోధ్యలోని రామమందిరం మీద ఓ సినిమా చేయబోతున్నట్లు ప్రకటించింది కంగన. వచ్చే ఏడాది నుంచి ఈ సినిమా షూటింగ్‌ ప్రారంభంకానున్నట్లు తెలిపింది. ఇప్పటికే దీనికి సంబంధించిన కథను 'బాహుబలి' సృష్టికర్త విజయేంద్రప్రసాద్‌ రాస్తున్నారని చెప్పుకొచ్చింది.
"ఎంతో కీలకమైన అయోధ్య మీదనే ఎందుకు సినిమా తీయాలనుకుంటున్నారు..?" అని ఓ విలేకరి కంగనాను ప్రశ్నించగా.. "కొన్ని వందల ఏళ్ల నుంచి రామమందిరం అనేది ఓ కీలక అంశంగా ఉంది. అయోధ్య కేసు దేశ రాజకీయాలను ఎంతగానో మార్చింది. అలాగే శతాబ్దాల నాటి ఈ వివాదం భారతదేశంలోని లౌకిక స్ఫూర్తిని ప్రతిబింబించే తీర్పుతో ముగిసిపోయింది. ఓ నాస్తికుడు భక్తుడిగా ఎలా మారాడో చూపించేదే మా 'అపరాజిత అయోధ్య'. ఓ రకంగా ఈ సినిమా నా వ్యక్తిగత జీవితాన్ని కూడా ప్రతిబింబిస్తుంది. నేను నిర్మాతగా తెరకెక్కించబోయే మొదటి సినిమాకు ఈ కథ బాగుంటుందని భావించాను." అని కంగన తెలిపింది.
ఇవీ చూడండి.. నిర్మాతగా మారనున్న అక్కినేని కోడలు..!
