ప్రధానితో 'బంధం' గురించి జెన్నిఫర్​ చెప్పిన కథ ఇది!

బ్రిటన్ ప్రధాని బోరిస్ జాన్సన్​పై ఆసక్తికర వ్యాఖ్యలు చేశారు వ్యాపారవేత్త జెన్నిఫర్ అర్క్యురీ. తన హృదయాన్ని గాయపర్చినట్లు పేర్కొన్నారు. ఓ ప్రముఖ షోలో బోరిస్​తో తనకున్న సంబంధం గురించి పలు విషయాలు పంచుకున్నారు.

బ్రిటన్ ప్రధాని తనకు అనుకూలంగా నిధులు కేటాయించారని ఆరోపణలు ఎదుర్కొంటున్న అమెరికా వ్యాపారవేత్త జెన్నిఫర్ అర్క్యురీ బోరిస్ జాన్సన్​పై ఆసక్తికర వ్యాఖ్యలు చేశారు. ప్రధాని బోరిస్ తన హృదయాన్ని గాయపరిచి తనను అవమానించినట్లు తెలిపారు. తనను బోరిస్​ నిర్లక్ష్యం చేస్తున్నారని ఆరోపించారు. లండన్​లోని ఓ ప్రముఖ షోలో బోరిస్​తో తనకున్న సంబంధం గురించి పలు విషయాలు పంచుకున్నారు అర్క్యురీ.

'నేను నీతో చాలా విశ్వాసం, నమ్మకంతో ఉన్నాను. నీ రహస్యాలు నాతో దాచుకున్నాను. నేను నీకో మంచి స్నేహితురాలిలా ఉన్నాను. నువ్వు(బోరిస్​ను ఉద్దేశించి) నా మనసుకు గాయం చేశావు. నన్నో సమస్యగా భావించావు. నీ ప్రవర్తనతో నా గుండె పగిలిపోయింది. నన్ను ఎందుకు పట్టించుకోవడంలేదో అర్థం కావట్లేదు. నేను కేవలం ఒక రాత్రి కోసమే ఉన్నట్లు భావించావు. లేదంటే నేను ఏదో బార్​ ముందు కనిపించిన మహిళలా అనుకున్నావు కానీ నీకు నా గురించి తెలుసు.'-జెన్నిఫర్ అర్క్యురీ

ఫోన్​లో మాట్లాడటానికి ప్రయత్నించినప్పటికీ బోరిస్ విముఖత చూపిస్తున్నారని అర్క్యూరీ ఆరోపించారు.

'నేను ఫోన్​ చేసినప్పుడు ఆయన నా గొంతు విన్నారు. మాట్లాడింది బోరిస్ అని నాకు తెలుసు. నన్నెందుకు బ్లాక్​ చేశావ్​? అని అడిగాను. నేనేం సమస్యలు సృష్టించడానికి ఫోన్​ చేయలేదు. ఏం జరిగిందో తెలుసుకోవడానికే ప్రయత్నించాను. అతను వెంటనే ఫోన్ కట్ చేశారు.'-జెన్నిఫర్ అర్క్యురీ

బోరిస్ జాన్సన్ లండన్ మేయర్​గా ఉన్నప్పుడు విదేశీ వాణిజ్య కార్యకలాపాలపై నియంత్రణ సహా ప్రజాధనాన్ని (దాదాపు 1,63,000, 1,47,000 యూరోలను) అక్రమంగా పొందినట్లు జెన్నిఫర్ అర్క్యురీపై ఆరోపణలు ఉన్నాయి.

'మా ఇద్దరి గురించి కథనాలు బయటకు వచ్చినప్పుడు చాలా భిన్నాభిప్రాయాలు వ్యక్తమయ్యాయి. సగం మంది నా దగ్గరకు వచ్చి వాటిని ఖండించమన్నారు. మరి కొంతమంది మా ఇద్దరి మధ్య సంబంధాన్ని ఒప్పుకోమని సూచించారు.'-జెన్నిఫర్ అర్క్యురీ

ఈ ఆరోపణల మధ్యే బోరిస్ మరో వ్యక్తిని పెళ్లి చేసుకున్నారు. మాజీ కన్జర్వేటివ్ పార్టీ ప్రతినిధి క్యారీ సైమండ్స్​తో సంబంధం ఏర్పరుచుకున్నారన్న కారణంగా బోరిస్​ను తన భార్య వదిలిపెట్టారు. ప్రస్తుతం డౌనింగ్​ స్ట్రీట్​లో(బ్రిటన్ ప్రధాని నివాస స్థలం) బోరిస్​, క్యారీ కలిసి ఉంటున్నారు.

అసత్య ఆరోపణలే

అయితే అర్క్యురీకి బ్రిటన్ డిజిటల్, సాంస్కృతిక, మీడియా, క్రీడా శాఖ ద్వారా నిధులు కేటాయించినట్లు ప్రభుత్వం తెలిపింది. సైబర్ నైపుణ్యాల నిమిత్తం నిధులన్నీ సక్రమంగానే కేటాయించినట్లు స్పష్టం చేసింది. అక్రమాలు జరిగాయన్నవి కేవలం లేబర్ పార్టీ అసత్య ఆరోపణలని తోసిపుచ్చింది.