జపాన్ టోక్యోలో ఓ టెలికాం సంస్థకు చుక్కలు చూపించిన ఓ వృద్ధుడిని అరెస్ట్ చేశారు పోలీసులు. సేవలు నచ్చలేదంటూ కస్టమర్ కేర్ సెంటర్కు 24 వేల సార్లు ఫోన్లు చేసి ఫిర్యాదు చేసిన అకిటోషి-ఒకమాటోను పోలీసులు అదుపులోకి తీసుకున్నారు.
జపాన్లో ప్రముఖ టెలీ కంపెనీ కేడీడీఐకి, 71 ఏళ్ల అకిటోషికీ మధ్య వివాదం నెలకొంది. తనతో ఆరంభంలో కుదుర్చుకున్న ఒప్పందాన్ని కేడీడీఐ ఉల్లంఘించిందంటూ ఆరోపించాడు ఆ పెద్దాయన. వారి సేవలు తనకు ముందు చెప్పిన విధంగా లేవంటూ కస్టమర్ సర్వీస్ సెంటర్కు ఫోన్లు చేయడం ప్రారంభించాడు.
8 రోజుల్లోనే కొన్ని వందల సార్లు ఫోన్లు చేశాడు. అదే పనిగా విసిగిస్తున్నాడని ఆ సంస్థ పోలీసులను ఆశ్రయించగా.. విచారణలో ఆయన వేరు వేరు ఫోన్లలో నుంచి సుమారు 24 వేల సార్లు ఫోన్లు చేశాడని తేలింది. అందుకే.. అకిటోషిని అరెస్ట్ చేశారు పోలీసులు.
అయితే.. అకిటోషి మాత్రం ఆ సంస్థ చేసింది తప్పు కాబట్టే నేను అలా చేశానని.. ఆ కంపెనీ సిబ్బంది నాకు క్షమాపణ చెప్పి తీరాలని డిమాండ్ చేస్తున్నాడు.
ఇదీ చదవండి:త్వరలో నెటిజన్ల ముందుకు 'క్వీన్' జయలలిత
