పాకిస్థాన్లోని జైలులో ఉన్న ముంబయి ఉగ్రదాడుల సూత్రధారి హఫీజ్ సయీద్కు సకల రాజభోగాలు అందుతున్నాయి. లాహోర్లోని కోట్ లఖ్పత్ కారాగారంలో ఉంటున్న అతడు పోలీసులు, ఖైదీల మధ్య వివాదాలను పంచాయితీల ద్వారా పరిష్కరిస్తున్నాడు.
తాజాగా జరిగిన ఓ బడా సెటిల్మెంట్ను చూస్తే హఫీజ్ పాక్ జైలులో ఎంత స్వేచ్ఛగా జీవిస్తున్నాడో అర్థం అవుతుంది. పోలీసు కస్టడీలో మరణించిన వ్యక్తి కుటుంబం, అధికారుల మధ్య వివాదాన్ని సయీద్ పరిష్కరించినట్లు సమాచారం.
ఏటీఎం చోరీ కేసులో..
గత నెలలో ఏటీఎం దొంగతనం కేసులో అనుమానితుడు, మతిస్థిమితం లేని సలాబుద్దీన్ అయూబీని పోలీసులు అదుపులోకి తీసుకున్నారు. అయూబీ కస్టడీలోనే మృతిచెందాడు. పోలీసుల చిత్రహింసల కారణంగానే అతను మరణించాడని ఆరోపణలు ఉన్నాయి.
ఈ నేపథ్యంలో అయూబీ కుటుంబ సభ్యులను సయీద్ కలిశారు. కేసుతో సంబంధమున్న పోలీసులను క్షమించి వదిలేయాలని వారిని ఒప్పించాడు. ఇందుకు ఆయూబీ కుటుంబం నివసిస్తున్న గుజ్రన్వాలాకు రూ.80 కోట్లతో రోడ్డు, గ్యాస్ సరఫరా ఏర్పాటు చేసేలా పోలీసులతో సయీద్ ఒప్పందం చేసుకున్నాడని ఓ ప్రభుత్వ అధికారి తెలిపారు.
"ఆయూబీ కుటుంబంలో సయీద్ అభిమానులు ఉన్నారు. ఫలితంగా సయీద్తో కుటుంబ సభ్యులకు ప్రత్యేక సమావేశం ఏర్పాటు చేశారు పోలీసులు. రెండు వైపుల వాదనలు విన్న సయీద్ బాధిత కుటుంబానికి 3 అవకాశాలు ఇచ్చాడు. అవి... పోలీసుల నుంచి డబ్బు లేదా దేవుని పేరుమీద క్షమించి వదిలేయటం లేదా వారిపై చట్ట ప్రకారం చర్యలు తీసుకోవటం. క్షమించి వదిలేయాలని కుటుంబం నిర్ణయించుకుంది."
- ప్రభుత్వ అధికారి, పాకిస్థాన్
ధ్రువీకరించి బాధిత కుటుంబం
ఆయూబీ కుటుంబం కూడా ఈ విషయాన్ని ధ్రువీకరించింది. మృతుడి తండ్రి అఫ్జల్ ఘుమ్మన్ ఈ విషయం నిజమేనని తెలిపాడు. సయీద్ ఆదేశాల మేరకు పంజాబ్ గవర్నర్ చౌదురి సర్వార్ రోడ్డు, గ్యాస్ సరఫరా వ్యవస్థ ఏర్పాటు చేస్తామని హామీ ఇచ్చారని చెప్పాడు.
2016లో సయీద్ స్థాపించిన ఉగ్రసంస్థ జమాత్ ఉద్ దవా.. పంజాబ్లో సమాంతర ప్రభుత్వాన్ని ఏర్పాటు చేసిందన్న ఆరోపణలతో దర్యాప్తు ప్రారంభించింది పాక్. లాహోర్లోని సంస్థ కార్యాలయంలో ఎన్నో సెటిల్మెంట్లు జరిగేవి. ఇవన్నీ రుజువైనా వారిపై చట్ట ప్రకారం ఎలాంటి చర్యలు తీసుకోకపోవటం గమనార్హం.
ఇదీ చూడండి: జాతీయ నేతకు చెప్పుల దండ, గాడిదపై ఊరేగింపు!
