6 రోజులు మంచులోనే వృద్ధురాలు- బతికి బయట పడిందిలా..

68 ఏళ్ల వృద్ధురాలు మంచులో చిక్కుకుని ఆరు రోజులు గడిపిన ఘటన అమెరికా ఉత్తర కాలిఫోర్నియాలో జరిగింది. చివరకు ఆమెను పోలీసులు గుర్తించి, ఆస్పత్రికి తరలించారు.

అమెరికా ఉత్తర కాలిఫోర్నియాలో అసాధారణ ఘటన జరిగింది. హిమపాతంలో చిక్కుకున్న ఓ వృద్ధురాలు... 6 రోజుల తర్వాత సురక్షితంగా బయటపడింది.

అసలు ఏం జరిగింది?

ఉత్తర కాలిఫోర్నియా ఓరోవిల్​కు చెందిన 68 ఏళ్ల వృద్ధురాలు పౌలా బెత్ జేమ్స్ ఈనెల 9న కనిపించకుండా పోయింది. ఆమె కోసం కుటుంబసభ్యులు పోలీసులుకు ఫిర్యాదు చేయగా.. గాలింపు చర్యలు చేపట్టారు. మంచు విపరీతంగా కురుస్తుండటం వల్ల హెలికాఫ్టర్​ సాయంతో విహంగవీక్షణం చేశారు. ఓరోవిల్​కు 50 కిలోమీటర్ల దూరాన ఉన్న బుట్టే మెడోస్​లోని ఓ నిర్మానుష్య ప్రాంతంలో పౌలా ప్రయాణించిన ఎస్​యూవీ కారు కనిపించింది. ప్రత్యేక వాహనంలో చేరుకున్న అధికారులు... కారులో పౌలా ఉన్నట్లు గుర్తించారు. ఆమెను ఆస్పత్రికి తరలించారు.

అలా బతికింది...

పౌలా మానసిక రుగ్మతతో బాధపడుతోంది. తెలియక బుట్టే మెడోస్​కు కారులో వెళ్లి, మంచులో చిక్కుకుపోయింది. అయితే... ఆరు రోజులు అలానే గడిపినా ఆమె ఆరోగ్యం స్థిరంగా ఉండడం విశేషం. కారులోని దుప్పట్లు, ఫ్లోర్​ మ్యాట్లను చుట్టుకుని..., హీటర్​ను అప్పుడప్పుడు ఆన్​ చేయడం ద్వారా పౌలా చలిని తట్టుకోగలిగిందని చెప్పారు ఆమె కుటుంబసభ్యులు.

ఇదీ చూడండి: 'ఐ డ్రాప్స్'​తో భర్తను హత్య చేసిన భార్య- 25ఏళ్ల శిక్ష