ఇస్లామిక్ స్టేట్ ఉగ్రసంస్థ గత సంవత్సరం భారత్‌లోనూ దాడులకు యత్నించిందని అమెరికాకు చెందిన ఓ ఉన్నతాధికారి తెలిపారు. కానీ, వారు చేసిన ప్రయత్నాలన్నీ విఫలమయ్యాయన్నారు. ఐసిస్‌కు చెందిన ఖొరసన్‌ గ్రూప్‌(ఐసిస్‌-కె) ఈ మేరకు ప్రణాళికలు రచించిందని అమెరికా ఉగ్రవాద నిరోధక కేంద్రం డైరెక్టర్‌ రస్సెల్‌ ట్రావర్స్‌ వెల్లడించారు.
భారత్లో దాడికి యత్నం
భారత సంతతికి చెందిన సెనెటర్ మ్యాగీ హాసన్‌ అడిగిన ఓ ప్రశ్నకు బదులిస్తూ.. ఐసిస్‌కు అనుబంధంగా పనిచేస్తున్న ఉగ్రసంస్థల్లో ‘ఐసిస్‌-కె’నే అత్యంత ప్రమాదకరమని ఆయన అన్నారు. ఇన్నాళ్లు కేవలం అఫ్గానిస్థాన్‌పైనే గురిపెట్టిన ఈ సంస్థ గత సంవత్సరం ఇతర ప్రాంతాలకూ తన ప్రణాళికలు విస్తరించిందని తెలిపారు. అందులో భాగంగా భారత్లో ఆత్మాహుతి దాడికి యత్నించారని.. కానీ, అది విఫలమయ్యిందని చెప్పారు.
గత నెల పాకిస్థాన్‌, అఫ్గానిస్థాన్‌లోని కీలక ప్రాంతాల్లో ట్రావర్స్‌ పర్యటించారని, పలువురు భద్రతాధికారులు, నిఘా వర్గాలతో భేటీ అయ్యారని గుర్తు చేస్తూ.. ఈ పర్యటన ద్వారా ఐసిస్‌-కే ప్రాబల్యం పెరుగుతోందన్న విషయం స్పష్టంగా అర్థమయ్యిందన్నారు. ఇది తీవ్ర ఆందోళనకు గురిచేస్తోందన్నారు.
అమెరికాకు ముప్పుగా మారే అవకాశం
ప్రపంచవ్యాప్తంగా ఐసిస్‌కు అనుబంధంగా 20గ్రూపులు పనిచేస్తున్నాయని గతవారం ట్రావర్స్‌ ఓ సందర్భంలో తెలిపారు. వీటిలో కొన్ని.. దాడులకు డ్రోన్‌ లాంటి అత్యాధునిక సాంకేతికతను వాడుతున్నాయని వెల్లడించారు. సిరియా, ఇరాక్‌లో ఐసిస్‌ని పూర్తిగా తుడిచిపెట్టినప్పటికీ.. ప్రపంచవ్యాప్తంగా విస్తరించిన దాని మూలాలు అమెరికాకి ముప్పుగా పరిణమించే అవకాశం ఉందన్నారు.
2017లో న్యూయార్క్‌లో భారీ దాడికి యత్నించి ఐసిస్‌-కే ఘోరంగా విఫలమైందని గుర్తుచేశారు. అలాగే 2017లో స్టాక్‌హోంలో జరిపిన దాడిలో ఐదుగురు మరణించారని తెలిపారు. ఈ ఉదంతాలతో ఐసిస్‌-కే తన పరిధిని విస్తరించుకుంటోందనడానికి బలం చేకూరిందన్నారు. అలాగే అల్‌ఖైదా ఇప్పటికీ.. హక్కానీ నెట్‌వర్క్‌ సహా పాకిస్థాన్‌, అఫ్గానిస్థాన్‌లోని పలు ఉగ్రసంస్థలతో సంబంధాలు కొనసాగిస్తోందన్నారు.
ఇదీ చూడండి : కళాశాల అధ్యాపకుడిని దారుణంగా కొట్టిన విద్యార్థులు
