రాజులు పోయినా.. వారి విలాసవంతమైన జీవనాన్ని అక్కడక్కడా మ్యూజియాల్లో, వారు నిర్మించిన కట్టడాల్లో చూస్తునే ఉంటాం. కానీ ఈ మ్యూజియంలో ఉన్న విలాసవంతమైన వస్తువులు మాత్రం రాజులవి కావు. ఒకప్పుడు మెక్సికో దేశాన్ని గడగడలాడించిన కొంతమంది డాన్‌లు వాడిన ఖరీదైన వస్తువులు. మెక్సికో ప్రభుత్వం వీటి కోసం ఓ మ్యూజియం ఏర్పాటు చేసి ప్రదర్శనకు పెట్టింది. అయితే ఇందులో కేవలం ప్రభుత్వ గూఢచారులకు, శిక్షణలో ఉన్న సైనికులకు మాత్రమే ప్రవేశం పరిమితం చేసింది. డాన్ల గురించి అధ్యయనం చేయడానికి ఈ విలాసవంతమైన వస్తువులను వారికోసం పాఠ్యాంశంగా చేసింది.
వజ్రాలతో పొదిగిన తుపాకులు
బంగారం, వజ్రాలు, రత్నాలతో నగిశీలు దిద్దిన తుపాకులు అందంగా ఈ మ్యూజియంలో మనకు దర్శనమిస్తాయి. అప్పట్లో వీటిని డాన్‌లు వారి హోదాకు తగ్గట్టు ఉపయోగించే వారు. వాటిలో కొన్నింటిపై సంక్షిప్తమైన అక్షరాలు కనిపిస్తాయి. అవి డాన్ల పేర్లను, హోదాను తెలిపే సంక్షిప్తమైన అక్షరాలు. ఏసీఎఫ్ అంటే 'లార్డ్ ఆఫ్ ది స్కైస్' అని అర్థం. దీనిని ఒకప్పుడు అమాడో కారిల్లో ఫ్యుఎంటెస్ అనే డాన్ ఉపయోగించే వారు. అలాగే వజ్రాలతో పొదిగిన కోల్ట్ 45 తుపాకిని జోక్విన్ ఎల్ చాపో అనే చీకటి సామ్రాజ్యాధినేత వాడేవారు. 2016 అరెస్టు సమయంలో చాపో నుంచి పోలీసులు ఈ తుపాకిని స్వాధీనం చేసుకున్నారు.
ఏ డాన్ ఏ డ్రగ్ రవాణా చేసేవారు?
ఆయుధాలతో పాటు డాన్‌లు వాడిన ఆభరణాలు చూస్తే మరింత ఆశ్చర్యం కలుగుతుంది. ప్రత్యేకంగా తయారు చేయించుకున్న కీ చైన్లు, చేతి గడియారాలు, బ్రేస్‌లెట్లు డాన్ల నేర ప్రవృత్తితో పాటు స్వీయ సౌందర్యం పట్ల వారికున్న అభిరుచిని తెలియజేస్తుంది. వీటితో పాటు వారు సరఫరా చేసిన మాదక ద్రవ్యాలను అధికారులు ప్రదర్శనకు పెట్టారు. ఏ డాన్ ఏ మాదక ద్రవ్యాన్ని రవాణా చేసేవారో వివరంగా అక్కడ రాశారు.
ఇప్పటికీ మెక్సికో ప్రభుత్వానికి కంటి మీద కునుకు ఉండటం లేదు. మాదకద్రవ్యాల అక్రమ దందాలో కొత్త డాన్‌లు పుట్టుకోస్తుండటం అక్కడి ప్రభుత్వానికి తలనొప్పిగా మారింది. అందుకే ఈ చీకటి సామ్రజ్యానికి వ్యతిరేకంగా పోరాడే అధికారుల కోసం ఈ మ్యూజియాన్ని శిక్షణ కేంద్రంగా మలిచింది.
