వాడిపారేసిన ప్లాస్టికే... రోడ్డు పక్కన స్టాళ్లైతే.. ఇలా ఉంటాయి!

హైదరాబాద్ నగరంలో త్వరలో ప్లాస్టిక్ స్టాల్స్ అందుబాటులోకి రానున్నాయి. అదేంటి ప్లాస్టిక్​కు వ్యతిరేకంగా ఉద్యమిస్తుంటే... ప్లాస్టిక్స్​ స్టాల్సేంటి అనే కదా మీ ప్రశ్న.. అక్కడికే వస్తున్నాం. ఈ స్టాల్స్​ రీసైకిల్ చేయబడ్డ స్టాల్స్​. నగరవాసుల్లో, చిరువ్యాపారుల్లో ప్లాస్టిక్​పై  అవగాహన కల్పించేందుకు జీహెచ్​ఎంసీ నడుం బిగించింది. 55 స్టాళ్ల నిర్మాణం కోసం ఏకంగా 40 టన్నుల ప్లాస్టిక్​ను రీసైకిల్​ చేసి వీధి వ్యాపారులకు అందించనుంది.

ప్లాస్టిక్ రీసైకిలింగ్ తో తయారు చేసిన స్టాల్స్​ను వీధి వ్యాపారులకు అందించేందుకు జీహెచ్ఎంసీ చర్యలు తీసుకుంటోంది. 40 టన్నుల ప్లాస్టిక్ రీసైకిల్ తో 55 స్టాల్స్​ తయారు చేస్తోంది. మరికొద్ది రోజుల్లో వీటిని హైటెక్ సిటీ ప్రాంతంలో వీధి వ్యాపారులకు అందించేందుకు యుద్ద ప్రాతిపాదికన పనులు చేస్తోంది. ఈ స్టాల్స్​ దగ్గర ప్లాస్టిక్ ను పూర్తిగా నిషేధించాలని బల్దియా నిర్ణయం తీసుకుంది.

ప్రతి కప్పు.. ప్రతి ప్లేటు ప్లాస్టిక్ ఫ్రీనే...

హైదరాబాద్​ను ప్లాస్టిక్ రహిత నగరంగా మార్చేందుకు ప్రభుత్వం పలు చర్యలు తీసుకుంటోంది. ఇప్పటికే నగరంలో సింగిల్ యూజ్ ప్లాస్టిక్ వాడుతున్న పలు వ్యాపార కంపెనీలకు జరిమానాలు విధించింది. ప్లాస్టిక్​పై ప్రజల్లో విస్తృత అవగాహన కల్పిస్తోంది. అందులో భాగంగానే వీధి వ్యాపారుల కోసం రీసైకిల్డ్​ ప్లాస్టిక్​తో తయారు చేసిన స్టాళ్లను అందించాలని జీహెచ్ఎంసీ జోనల్ కమిషనర్ హరిచందన నిర్ణయం తీసుకున్నారు. ఛాయ్​ నుంచి మొదలుకొంటే టిఫిన్​, జ్యూస్​, భోజనం లాంటి విక్రయాలు ఏవైనా అక్కడ చేసుకోవచ్చు. టీ కప్పులు, గ్లాసులు, పళ్లాలు అన్నీ పర్యావరణహితంగా ఉండనున్నాయి. మొక్కజొన్న, అరటి ఆకులు, వెదురు లేదా స్టీల్‌ ప్లేట్లను మాత్రమే వాడనున్నారు.

ఎక్కడ ఏర్పాటు చేస్తున్నారు...?

హైటెక్ సిటీ శిల్పారామం ఎదురుగా అయ్యప్ప సొసైటీ అండర్‌పాస్‌ సమీపంలో రోడ్డు పక్కనే ఖాళీగా స్థలంలో 55 స్టాళ్లతో ఈ జోన్‌ను సిద్ధం చేస్తున్నారు. ఈ స్టాళ్ల ప్రాంతాన్ని ప్లాస్టిక్‌ రహిత వీధి వ్యాపారుల ప్రాంతంగా పిలువనున్నారు. హైటెక్‌ సిటీలో ప్రధాన రహదారులు, పాదబాటలను ఆక్రమించి తోపుడు బండ్లను, ఫుడ్‌ కోర్టులు, టీ, జ్యూస్‌ సెంటర్లను నిర్వహిస్తున్న వారందరినీ ఖాళీ చేయించి మరో 10-15 రోజుల్లో వీటిని ఏర్పాటు చేయనున్నారు.

స్టాళ్లను తయారు చేసిన గుజరాత్ సంస్థ...

వాడి పారేసిన ప్లాస్టిక్‌ సీసాలు.. సంచులను రీసైకిల్​ చేసి వీటిని తయారు చేశారు. గుజరాత్​కు చెందిన ఓ సంస్థకు నిర్మాణ బాధ్యతలను జీహెచ్​ఎంసీ అప్పగించింది. ఒక్కో స్టాల్​ తయారీకి దాదాపు 2 వేల ప్లాస్టిక్‌ సీసాలను రీసైకిల్‌ చేశారు. ఆరున్నర అడుగుల ఎత్తు, ఆరున్నర అడుగుల వెడల్పు సైజులో 45 పెద్దవి, మూడున్నర అడుగుల ఎత్తు, మూడున్నర అడుగుల వెడల్పులో 10 చిన్న స్టాళ్లను తయారు చేస్తున్నారు.

చిరు వ్యాపారులకు తొలిసారి ఫసాయ్​ సర్టిఫికేట్లు

ఒక్కో స్టాల్‌ ఏర్పాటుకు జీహెచ్‌ఎంసీ 90 వేల రూపాయలు ఖర్చు చేస్తోంది. 800 మీటర్ల విస్తీర్ణంలో వీటిని వరుసగా ఏర్పాటు చేస్తున్నారు. 40 టన్నుల ప్లాస్టిక్ రీసైకిల్ చేసి వీటిని తయారు చేస్తున్నారు. ఫుడ్‌ సేఫ్టీ అండ్‌ స్టాండర్డ్స్‌(ఫసాయ్​) ఆధ్వర్యంలో క్లీన్‌ స్ట్రీట్‌ ఫుడ్‌ హబ్‌ కార్యక్రమం కింద చిరు వ్యాపారులకు ప్రత్యేక శిక్షణ ఇస్తున్నారు. వీరికి ఫసాయ్​ గుర్తింపు పత్రాలు కూడా ఇవ్వనున్నారు.

ప్లాస్టిక్​ రహిత, పర్యావరణహిత హైదరాబాద్​ను నిర్మించేందుకు ప్రభుత్వం ఇప్పటికే అనేక చర్యలు తీసుకుంటోంది. ఈ నేపథ్యంలో ప్రతి పౌరుడికి ప్లాస్టిక్​పై, ప్రకృతిపై సరైన అవగాహన కలిగినప్పుడే పర్యావరణం బాగుపడుతుందని పర్యావరణవేత్తలు అంటున్నారు.