చీరలో మహిళల పరుగు... వెనకే పంచెల్లో పురుషులు!

నెక్లెస్​ రోడ్​లో ఈ ఉదయం మహిళలు పెద్దసంఖ్యలో శారీరన్​లో పాల్గొన్నారు. మహిళా ఆరోగ్య సమస్యలపై అవగాహన కల్పించారు. చీరల్లో పరుగు కార్యక్రమంలో పాల్గొన్న వారికి పురుషులు పంచెల్లో వచ్చి మద్దతు పలికారు.

హైదరాబాద్​లో ఆదివారమైందంటే ఎక్కడో ఓ చోట.. ఏదో ఒక పరుగు కార్యక్రమం జరుగుతూనే ఉంటుంది. అది ఆరోగ్యం కోసం కావొచ్చు... లేదంటే సామాజికం కోసం కావొచ్చు. కానీ ఈ రోజు నెక్లెస్ రోడ్​ వేదికగా ఓ వినూత్న పరుగు జరిగింది. మహిళల ఫిట్​నెస్​కు సంబంధించి 'శారీరన్'​ నిర్వహించారు. పెద్దసంఖ్యలో మహిళలు.. వారికి మద్దతు పలుకుతూ పురుషులు పరుగులో పాల్గొన్నారు.

తనైరా, పింకథాన్ ఆధ్వర్యంలో మూడో ఎడిషన్ శారీ రన్​ను మొదటిసారిగా హైదరాబాద్​లో నిర్వహించారు. నెక్లెస్ రోడ్ నుంచి జలవిహార్ వరకు నిర్వహించిన పరుగు పోటీలో దాదాపు 300 మంది మహిళలు చీరలతో వచ్చి ఉత్సాహంగా పాల్గొన్నారు. మహిళల ఫిట్​నెస్​, ఆరోగ్యంపై అవగాహన కల్పించారు. కార్యక్రమాన్ని ప్రముఖ బాలీవుడ్​ నటుడు, మోడల్ మిలింద్ సోమన్​ ప్రారంభించారు. ఈ శారీ రన్​కు మద్దతుగా ఆయన పంచె ధరించి పరుగులో పాల్గొన్నారు.

"మహిళలు ఫిట్​గా ఉండేందుకు ప్రోత్సహించడమే ఈ రన్​ లక్ష్యం. అదే సమయంలో తమకు సౌకర్యవంతమైన రీతిలోనే ఫిట్​నెస్​ను పొందవచ్చు. ప్రతి భారతీయ మహిళకు చీరతో విడదీయరాని అనుబంధం ఉంది. మహిళా సాధికారతతో ఆరోగ్యవంతమైన కుటుంబం, ఆరోగ్యవంతమైన దేశం...ప్రపంచం తయారవుతుంది."

-మిలింద్ సోమన్, నటుడు

'డోంట్​ హోల్డ్​ బ్యాక్​' అన్న నినాదంతో ఈ శారీరన్​ను ప్రారంభించారు నిర్వాహకులు. మహిళలకు చీరకట్టు వల్ల ఎలాంటి అసౌకర్యం ఉండదని.. పరుగు పోటీల్లో కూడా పాల్గొనవచ్చని నిరూపించారు. రొమ్ము క్యాన్సర్​పై అవగాహన కల్పించారు.