3 కమిషనరేట్లు - 13 కేసులు
హైదరాబాద్‌లో తొలిసారిగా.. ఐదుగురు సభ్యుల ఓజీ కుప్పం ముఠా పోలీసులకు పట్టుబడింది. ఒకే కుటుంబానికి చెందిన వీరంతా వివిధ రాష్టాల్లో పర్యటిస్తూ ప్రయాణికుల దృష్టి మళ్లించి నేరాలకు పాల్పడుతుంటారు. ఓజీ కుప్పం ముఠాకు చెందిన గాయత్రి ఆమె భర్త రాజు, సోదరి కోకిల, జ్యోతి ముఠాలో నిందితులుగా ఉన్నారు. 3 కమిషనరేట్ల పరిధిలో ఈనేరగాళ్లపై 13 కేసులు నమోదయ్యాయి.
25 తులాల బంగారం మాయం
మెహదీపట్నానికి చెందిన జయలక్ష్మి అనే వృద్ధురాలు జూన్‌లో సికింద్రాబాద్‌ నుంచి మెహదీపట్నం వరకు బస్సులో ప్రయాణించింది. గమ్యం చేరిన తర్వాత సంచి చూసుకోగా... అందులో 25 తులాల బంగారు ఆభరణాలు మాయమయ్యయి. వెంటనే పోలీసులకు ఫిర్యాదు చేసింది. బాధితురాలి ఫిర్యాదుతో పోలీసులు విచారణ చేపట్టారు. నేరం జరిగిన ప్రాంతంలో సీసీ కెమెరాలు పరిశీలించి అనుమానితులను ఆరాతీశారు.
దొంగను పట్టించిన ఫోన్ నెంబర్
ఒక చోట పోలీసులకు ఊహించిన ఆధారాలు లభించడం వల్ల అక్కడ సాంకేతిక ఆధారాలు సేకరించారు. కొన్ని కర్ణాటకకు చెందిన సెల్‌ నెంబర్లు గుర్తించి వాటి ఆధారంగా నిఘా ఏర్పాటు చేశారు. హైదరాబాద్‌లోని ఓ లాడ్జిలో ఆ ముఠాను పట్టుకున్నారు. ప్రతి రెండు నెలలకోసారి ఓనగరానికి వెళ్లి దృష్టి మళ్లించి చోరీలు చేస్తున్నట్టు పోలీసులు తెలిపారు.
ముఠాపై పీడీ చట్టం ప్రయోగం..?
దొంగిలించిన ఆభరణాలను విక్రయించగా వచ్చిన సొమ్ముతో జల్సాలు చేస్తున్నట్టు పోలీసులు తెలిపారు. నిందితుల నుంచి 35 తులాల బంగారం, 8 లక్షల నగదును పోలీసులు స్వాధీనం చేసుకున్నారు. ఈ ముఠాపై పోలీసు అధికారులు పీడీ చట్టం ప్రయోగించే యోచనలో ఉన్నారు.
