దారికి అడ్డంగా ఊరికే ఉండటమే బుద్ధి తక్కువ వ్యవహారం. అలాంటిది వేళ కాని వేళ.. చీకటి పడ్డాక సొల్లు కబుర్లు చెప్పుకుంటూ... మందు తాగి తందనాలు ఆడేందుకు నడి రోడ్డేమన్నా ఆడి తాత జాగీరా? కాదు కదా..! కానీ ఇక్కడ ఇది మా తాత జాగీరే అంటున్నారు ఓ ఏరియా బుడ్డ లీడర్లు.
దారివ్వండి.. ఇతరులను ఇబ్బంది పెట్టకండి అంటూ ప్రశ్నించిన ఓ యువకుణ్ని చావ బాదారు. ఒక్కడు కాదు. ఇద్దరు కాదు. గ్యాంగ్ గ్యాంగ్ అంతా ఒంటరి యువకునిపై శూరత్వం ప్రదర్శించారు. పిడిగుద్దులు కురిపించారు. బూటుకాళ్లతో తన్నారు. తీవ్ర గాయాలపాలైన యువకుడు ఆసుపత్రిలో చికిత్స పొందుతున్నాడు. రోడ్డుపై తాగి తందనాలు ఆడకండి. బుద్ధిగా ఉండండి అంటే ఇంత అరాచకమా? అని అడుగుతున్నాడా బాధిత బ్యాంకు ఉద్యోగి.
రోడ్డుకు అడ్డంగా బైకులు పెట్టి మద్యం సేవిస్తున్న సదరు గల్లీ లీడర్లు.. కాదు కాదు.. సిల్లీ లీడర్లు.. కేవలం దారికి అడ్డంగా ఉండొద్దన్నందుకు ఈ యువకుడిని చావబాదారు. లీడర్లంతా ఓ పెద్ద లీడరన్నకు అనుచరులట. అందుకే పోలీసులు కూడా కేసు గీసు జాన్తా నై.. అంటున్నరట. కాంప్రమైజ్, కాంప్రమైజ్ అని కేసు నాన్చుతున్నరట.
మంగళవారం రాత్రి కూకట్పల్లి మైత్రీనగర్లో ఈ దారుణం చోటుచేసుకుంది. రాజేష్ అనే ప్రైవేటు బ్యాంకు ఉద్యోగి విధులు ముగించుకొని ఇంటికి వస్తుండగా... ఈ ఘటన జరిగింది. అడ్డొచ్చిన వాచ్మెన్ భార్యను కూడా మహిళ అనే కనికరం లేకుండా కొట్టారు ఆ గూండాలు. ఫిర్యాదు చేసినా... ఇంత వరకు పోలీసులు స్పందించలేదని బాధితుడు చెప్తున్నారు.
ఇప్పుడు సీసీటీవీ వీడియో ఫుటేజి లభించింది. దీంతో ఫిర్యాదు తీసుకున్న స్థానిక పోలీసులు... కేసు వద్దంటూ నేరుగా రంగంలోకి దిగి సెటిల్మెంటుకు ప్రయత్నిస్తున్నారట! దాడిలో ఆ యువకుడి ప్రాణాలు పోయుంటే వీళ్లే తిరిగి తీసుకొచ్చి బతికిద్దురు గావొచ్చు. మరి పెద్ద సార్లూ... మీరన్న కేసు బందోబస్తుగ పెట్టించి గూండాలతోని ఊసలు లెక్కబెట్టిస్తరా.. లేకుంటే మీరు కూడా పెట్టి కేసుకు జైకొట్టి కాంప్రమైజ్.. కాంప్రమైజ్ అంటరా? ఐపీఎస్ చదివినోళ్లు.. మీకే తెలవాలె సారూ!
ఇదీ చూడండి: ఆర్టీఐ పరిధిలోకి సీజేఐ కార్యాలయం- సుప్రీం సంచలన తీర్పు
