మున్సిపాలిటీ, కార్పొరేషన్ల ఎన్నికలను మంత్రులు, ఎమ్మెల్యేలు తేలిగ్గా తీసుకోవద్దని పార్టీ అధినేత, ముఖ్యమంత్రి కేసీఆర్ స్పష్టం చేశారు. తెలంగాణ భవన్లో తెరాస విస్తృత స్థాయి సమావేశంలో.. మంత్రులు, పార్టీ ఎమ్మెల్యేలు, ఎంపీలు, ఎమ్మెల్సీలు, జెడ్పీ ఛైర్ పర్సన్లు, ముఖ్య నేతలకు కేసీఆర్ దిశా నిర్దేశం చేశారు. తమ నియోజకవర్గంలోని అభ్యర్థులను గెలిపించుకోకపోతే... మంత్రులకు పదవులు ఉండవని సీఎం వ్యాఖ్యానించారు. అభ్యర్థుల ఎంపిక, అసంతృప్తుల బుజ్జగింపులు, ప్రచార వ్యూహాల ఖరారు బాధ్యతలన్నీ స్థానిక ఎమ్మెల్యేలదేనని స్పష్టం చేశారు.
అందరూ కలిసి సమన్వయంతో పనిచేయండి: కేసీఆర్
టికెట్ ఎవరికి వచ్చినా అందరూ పనిచేయాల్సిందేనని తెలిపారు. ఎక్కడైనా అంతర్గత విబేధాలు కనిపిస్తే సహించేది లేదని... వాటిని సర్దుబాట్లు చేయాల్సిన బాధ్యత స్థానిక ఎమ్మెల్యేలు, జిల్లా మంత్రులదేనన్నారు. కొత్త, పాత అనే తేడా లేకుండా పార్టీలో అందరూ కలిసి పనిచేయాలని చెప్పారు.
అతివిశ్వాసంతో వెళ్లకండి: కేసీఆర్
మంత్రులు, ఎమ్మెల్యేలు అతి విశ్వాసంతో వెళ్లవద్దని... సంబంధం లేని విషయాల్లో తలదూర్చవద్దని చెప్పినట్లు సమాచారం. గతంలో బాబూమోహన్ను ఎమ్మెల్యేగా చేస్తే.. ఇష్టారాజ్యంగా వ్యవహరించి నష్టపోయారని గుర్తు చేశారు.
ఆ అపోహలు మానుకోండి...
భాజపా పోటీ ఇస్తుందన్న పనికి రాని ప్రచారాన్ని, అపోహలను పట్టించుకోవాల్సిన అవసరమే లేదని పార్టీ శ్రేణులకు కేసీఆర్ చెప్పారు. అవసరమైన చోట ఎమ్మెల్యేలు, ఎంపీలను ప్రచారానికి ఆహ్వానించాలని సూచించారు.
వర్గపోరుపై అసహనం...
మేడ్చల్ నియోజకవర్గంలో మంత్రి మల్లారెడ్డి, మాజీ ఎమ్మెల్యే సుధీర్ రెడ్డి మధ్య వర్గ పోరు పట్ల సీఎం అసహనం వ్యక్తం చేసినట్లు తెలిసింది. సమావేశం అనంతరం ఇద్దరిని పిలిచి మాట్లాడారు. అందరినీ కలుపుకొని పనిచేయాలని మంత్రికి చెప్పినట్లు సమాచారం. సమావేశం అనంతరం తెరాస కార్యనిర్వాహక అధ్యక్షుడు కేటీఆర్ పలు జిల్లా నేతలతో విడివిడిగా సమావేశమయ్యారు.
