ఫంక్షన్‌హాల్‌లో కూలిన గోడ... నలుగురు మృతి

వేడుకలో విషాదం చోటుచేసుకుంది. అంతసేపు సంతోషంగా ఉన్న ఆ ప్రాంతమంతా ఒక్కసారిగా అరుపులతో దద్దరిల్లింది. ఏం జరుగుతుందో గ్రహించేలోపే అంతా అయిపోయింది. ఫంక్షన్‌హాల్‌లో గోడ కూలి నలుగురు మృతిచెందిన ఘటన గోల్నాకలో చోటుచేసుకుంది.

హైదరాబాద్​లోని గోల్నాక పెరల్‌గార్డెన్‌ ఫంక్షన్‌హాల్‌లో గోడకూలి నలుగురు మృతిచెందారు. అసలేం జరిగిందంటే.... ఫంక్షన్‌హాల్‌ కొద్దికాలంలో వాడుకలో లేదు. ఇటీవలే మరమ్మతులు చేశారు. ఈక్రమంలో ఆదివారం అందులో ఓ వేడుక జరుగుతోంది. అంతలోనే అనుకోకుండా ఓ పెద్ద శబ్దం వచ్చింది. ఏం జరుగుతోందని ఆలోచించేలోపే గోడ కూలిపోయింది. ఈ ఘటనలో ఓ మహిళ సహా నలుగురు మృతిచెందారు. ఎనిమిది మంది క్షతగాత్రులను ఉస్మానియాకు తరలించారు. ఒకరి పరిస్థితి విషమంగా ఉంది.