ఎస్బీఐ క్రెడిట్ కార్డుల పేరిట మోసం చేస్తున్న వ్యక్తిని హైదరాబాద్ సైబర్ క్రైం పోలీసులు అరెస్ట్ చేశారు. దరఖాస్తు చేసిన వారికి క్రెడిట్ కార్డులు ఇవ్వకుండా.. వారి పేర్లు మీద కార్డులు పొంది.. రూ.15 లక్షలు స్వాహా చేసిన కేసులో నెమళ్ల శ్రీధర్ అనే వ్యక్తిపై కేసు నమోదుచేశారు.
ఎస్బీఐ క్రెడిట్ కార్డులు పేరిట పొరుగు సేవల సిబ్బంది హైదరాబాద్లోని పలు దుకాణ సముదాయాలు, ఇతర ప్రాంతాల్లో తిరిగి దరఖాస్తులను స్వీకరిస్తున్నారు. అనంతరం వాటిని ఎస్బీఐ క్రెడిట్ కార్డు విభాగం అధికారులకు పంపిస్తారు. పరిశీలన అనంతరం దరఖాస్తు దారుల్లో అర్హులకు ఎస్బీఐ అధికారులు కార్డులను పంపిస్తారు. అలా పంపించిన కార్డులను శ్రీధర్ బృందం తీసుకొని రుణ పరిమితి వరకు వినియోగించినట్లు పోలీసులు గుర్తించారు. కార్డులు వినియోగిస్తుండడం.. నెలవారీ నగదు జమచేయకపోవడంపై అనుమానమొచ్చిన అధికారులు సైబర్ క్రైంను ఆశ్రయించారు. దర్యాప్తు చేపట్టిన పోలీసులు నకిలీ పత్రాల ఆధారంగా కార్డులు తీసుకున్నట్లు తేల్చారు. అనంతరపురం జిల్లాకు చెందిన నెమళ్ల శ్రీధర్ను అదుపులోకి తీసుకున్నారు. నిందితుడు నాలుగు నెలల క్రితమే హైదరాబాద్ వచ్చినట్లు గుర్తించారు. అనంతరం కోర్టు ఆదేశాలతో జైలుకు తరలించారు.
ఇవీచూడండి: బ్లాక్లో రైల్వే టికెట్లు.. వెయ్యికిపైగా స్వాధీనం
