బాణాసంచా కాల్చుతున్నారా... ఈ జాగ్రత్తలు పాటించండి

దీపావళి వేడుకలు ఘనంగా జరుపుకునేందుకు నగర ప్రజలు సిద్ధమవుతున్నారు. ఈ పర్వదినాన చిన్నా పెద్దా తేడా లేకుండా బాణాసంచా కాల్చుతూ అనందాన్ని పొందుతారు. దీపాలంకరణలతో సంతోషంగా జరుపుకునే దీపావళి రోజున... విషాదాన్ని దరిదాపులకు రాకుండా తీసుకోవాల్సిన జాగ్రత్తలు సూచిస్తున్నారు వైద్య నిపుణులు, అగ్నిమాపక శాఖ అధికారులు.

దీపావళి రోజున చిన్నా పెద్ద తేడా లేకుండా బాణాసంచా కాల్చి సంతోషాన్ని పొందుతారు. అంత వరకు బాగానే ఉంటుంది కానీ... ఏదైనా అనర్థం జరిగితే అవి కాస్తా సంబురాన్ని దూరం చేస్తాయి. ఆనందంగా వేడుకలు జరుపుకునేందుకు తగు జాగ్రత్తలు తీసుకోవాలని నిపుణులు సూచిస్తున్నారు. తయారీదారు వివరాలున్న టపాసులనే కొనుగోలు చేయాలని చెప్తున్నారు. ఇంట్లో దీపాలు వెలిగించేప్పుడు, టపాసులు కాల్చే సమయంలో పాటించాల్సిన జాగ్రత్తలు.

• గాలి వీస్తున్నప్పుడు పైకి ఎగిరేవి కాల్చవద్దు. కాల్చే ముందు చుట్టుపక్కల ఇళ్ల తలుపులు, కిటికీలు మూసి ఉండేలా చూసుకోవాలి.
• కాల్చిన బాణాసంచాను బకెట్‌లో వేయాలి.
• బకెట్‌ నిండా నీటిని దుప్పట్లను సిద్ధంగా ఉంచుకోవాలి.
• కళ్లకు హానీ జరగకుండా అద్దాలు వాడాలి.
• చిన్నపిల్లలకు ఇవ్వకుండా పెద్దవారు దగ్గర ఉండి కాల్చేలా చూడాలి.
• నూలు, ఖద్దరు దుస్తులు మాత్రమే ధరించాలి.
• చేతులు దూరంగా చాచి క్రాకర్లు వెలిగించాలి.

అంతే కాకుండా బాణసంచా కాల్చిన వెంటనే... వాటి దగ్గరకు పోవద్దని నిపుణులు చెబుతున్నారు. దీపావళి సందర్భంగా సరోజినీ దేవి కంటి దవాఖానాలో 24 గంటల పాటు అందుబాటులో ఉండనున్నట్లు వైద్యులు తెలిపారు.

దీపావళి పండుగను పురస్కరించుకొని ముందు జాగ్రత్తగా అగ్నిమాపక శాఖ తగు చర్యలు చేపట్టింది. ఎక్కడైనా అగ్ని ప్రమాదం చోటు చేసుకుంటే ఘటనా స్థలానికి వెంటనే చేరుకునేలా ఏర్పాట్లు చేసుకున్నారు. అగ్నిమాపక శకటాలతో పాటు ద్విచక్ర వాహనాలను కూడా సిద్ధంగా ఉంచారు.

ఇదీ చూడండి: హుజూర్​నగర్​లో ప్రగతి పరుగులు పెట్టాలి.....