తెలుగు రాష్ట్రాల్లో వాతావరణ మార్పుల నేపథ్యంలో కోళ్ల పరిశ్రమ వృద్ధి, క్షేత్రస్థాయిలో రైతుల అభ్యున్నతి కోసం ఏటా నవంబర్లో పౌల్ట్రీ ఇండియా ప్రదర్శన నిర్వహిస్తున్నట్లు ఐపీఈఎంఏ ఛైర్మన్ చక్రధర్ తెలిపారు. హైటెక్స్లో ఈనెల 27 నుంచి మూడు రోజులపాటు ఈ ప్రదర్శన జరగనుంది. ఇందులో భాగంగా 26న నాలెడ్జ్ డే పేరిట సదస్సు నిర్వహించనున్నామని వెల్లడించారు. ప్రదర్శన ఏర్పాట్లపై ఎర్రమంజిల్ ఎన్కేఎం గ్రాండ్ హోటల్లో చక్రధర్ వివరాలు వెల్లడించారు.
375 కంపెనీలు..
ప్రపంచ వ్యాప్తంగా కోళ్ల పరిశ్రమ ఎదుర్కొంటున్న సవాళ్ల పరిష్కారం, కేంద్ర, రాష్ట్ర ప్రభుత్వాలు చేయూత, కేజ్‌ బ్యాన్, చికెన్ దిగుమతి వంటి సమస్యలపై విస్తృతంగా చర్చించనున్నట్లు చక్రధర్ తెలిపారు. కోళ్ల పరిశ్రమలో వస్తున్న విప్లవాత్మక మార్పులు, ఆధునిక సాంకేతిక పరిజ్ఞానం, యాంత్రీకరణ, ఔషధాలు, పోషకాలపై హైటెక్స్ వేదికగా ప్రదర్శనలు, చర్చలు ఉంటాయన్నారు. దేశవిదేశాల నుంచి 375 కంపెనీలు తమ ఉత్పత్తులను ప్రదర్శిస్తాయని చక్రధర్ పేర్కొన్నారు.
ప్రభుత్వం సాయం గొప్పది..
పౌల్ట్రీ రంగం అభివృద్ధికి రాష్ట్ర ప్రభుత్వం ఎంతో కృషిచేస్తోందని తెలంగాణ పౌల్ట్రీ సమాఖ్య అధ్యక్షుడు ఎర్రబెల్లి ప్రదీప్రావు అన్నారు. మరిన్ని ప్రోత్సాహకాలు అందించాల్సిన అవసరం ఉందన్నారు. ఈ కార్యక్రమంలో సుమారు 35 వేల మంది రైతులు, కంపెనీల ప్రతినిధులు పాల్గొంటారని తెలిపారు.
ఇవీచూడండి: ఏఐఎఫ్డీడబ్యూ ప్రథమ మహాసభల గోడ పత్రిక
