భారత టెలికాం రంగంలోకి రిలయన్స్ జియో అడుగుపెట్టాక ప్రీపెయిడ్ పట్ల ప్రజల అభిప్రాయం మారిపోయింది. అంతకు ముందు ప్రీపెయిడ్కు బదులుగా పోస్ట్ పెయిడ్వైపే ఎక్కువగా మొగ్గు చూపేవారు వినియోగదారులు. ప్రత్యేకంగా అంతర్జాల వినియోగదారులు అధికంగా పోస్ట్ పెయిడ్నే ఎంచుకునేవారు. కానీ ఈ ధోరణిని జియో మార్చేసింది. 1జీబీ డేటాను కేవలం రూ.10కే అందించింది. జియో, ఎయిర్టెల్, వొడాఫోన్-ఐడియా నెట్వర్క్ల నుంచి అధికంగా ప్రీపెయిడ్ కనెక్షన్లు తీసుకుంటున్నారు.
కానీ పోస్ట్ పెయిడ్ ప్లాన్లలో ఉచిత ఓటీటీ సర్వీసులు లభిస్తున్నాయి. రిలయన్స్ జియో పోస్ట్పెయిడ్ సేవల్లో లేదు కానీ ఎయిర్టెల్, వొడాఫోన్ ఐడియా ఈ సేవలను తక్కువ రేట్లకే అందిస్తున్నాయి. రూ. 499లకే అన్ని రకాల సేవలను ప్రకటిస్తున్నాయి. ఈ ప్లాన్లలోనే నెట్ఫ్లిక్స్, అమెజాన్ ప్రైమ్, జీ5 వంటివీ ఉచితంగా అందిస్తున్నాయి. గతంలోని పోస్ట్పెయిడ్ ప్లాన్ల కన్నా ప్రస్తుతం అదనపు లాభాలు ఉన్నాయి.
పోస్ట్పెయిడ్ ప్లాన్స్..
ఎయిర్టెల్, వొడాఫోన్ ఐడియాలు ఇంచుమించు ఒకే విధమైన పోస్ట్ పెయిడ్ ప్లాన్లను అందిస్తున్నాయి. రెండు టెలికాం సంస్థలు పోస్ట్ పెయిడ్ ప్లాన్లలోనే ఓటీటీ సబ్స్క్రిప్షన్ను అందిస్తున్నాయి. ఈ ప్లాన్ల ధర రూ.499 నుంచి ప్రారంభమవుతోంది.
ఎయిర్టెల్లో
నెల రోజులకు గాను రూ.499తో 75జీబీ డేటా, దేశవ్యాప్తంగా ఏ నెట్వర్క్కు అయినా అన్లిమిటెడ్ కాల్స్, రోజుకు 100 ఎస్ఎంఎస్లు, రూ.1500 విలువైన నెట్ఫ్లిక్స్ సబ్స్క్రిప్షన్, ఏడాది పాటు అమెజాన్ ప్రైమ్ సభ్యత్వం, ప్రతినెలా రూ.99 విలువైన జీ5 సబ్స్క్రిప్షన్. హ్యాండ్ సెట్ రక్షణ, 500 జీబీ వరకు డేటా రోల్ఓవర్ సౌకర్యం ఉంది.
ఒకవేళ వినియోగదారుడు రూ.749, రూ.999, రూ.1,599 విలువైన ప్యాకేజీలను తీసుకున్నట్లయితే మరింత అదనపు లాభం పొందేలా ప్లాన్లు ఉన్నాయి. ఎయిర్టెల్లో రూ.299 ప్రీపెయిడ్ ప్లాన్ అమెజాన్ ప్రైమ్ సబ్స్క్రిప్షన్ను అందిస్తున్నప్పటికీ.. అది రూ.499 పోస్ట్పెయిడ్ ప్లాన్ను అధిగమించే పరిస్థితి లేదు.
వొడాపోన్- ఐడియాలో...
వొడాఫోన్ ఐడియాలో రూ.499తో పోస్ట్ పెయిడ్ ప్లాన్ అందిస్తోంది. ఇందులో 75జీబీ డేటాతో పాటు 200జీబీ డేటా రోల్ఓవర్ సౌకర్యం, అన్లిమిటెడ్ వాయిస్ కాలింగ్, ఏడాది పాటు అమెజాన్ ప్రైమ్ సబ్స్క్రిప్షన్, ఉచితంగా జీ5 ప్రీమియం అందిస్తోంది. రూ.649, రూ.999, రూ.1,299 వంటి ప్లాన్లలో మరిన్ని సేవలు ఉచితంగా పొందే వీలుంది. కుటుంబం కోసం ప్రత్యేక పోస్ట్ పెయిడ్ ప్లాన్లు అందిస్తోంది.
ప్రీపెయిడ్ ప్లాన్స్తో ఉపయోగమేంటీ..?
పోస్ట్పెయిడ్ ధరతోనే ప్రీపెయిడ్ ప్లాన్లు మంచి ప్రామాణికతను అందిస్తున్నాయి. ఎయిర్టెల్ 82 రోజుల వ్యవధితో రూ. 499కి రోజుకు 2జీబీ డేటా, అన్లిమిటెడ్ కాలింగ్, రోజుకు 100 ఎస్ఎంఎస్లు అందిస్తోంది. పోస్ట్పెయిడ్లో ఓటీటీ సబ్స్క్రిప్షన్, అమెజాన్ ప్రైమ్ వంటి వాటిని మినహాయిస్తే ప్రీ పెయిడ్ ప్లాన్లలో వినియోగదారులకు మంచి ప్రామాణికతను అందిస్తోంది.
రెండింట్లో ఏది ఉత్తమం...?
ప్రీపెయిడ్.. పోస్ట్ పెయిడ్... రెండింట్లో ఏది ఉత్తమం అనేది సగటు వినియోగదారుడి మదిలో మెదిలే ప్రశ్న. రూ.499 విలువైన ప్లాన్లను పరిశీలిస్తే.. ఏడాది కాలానికి (పన్నులు మినహాయించి) పోస్ట్పెయిడ్ ఛార్జీలు రూ.5,988కి చేరుతాయి. అదే సమయానికి ప్రీపెయిడ్ ఛార్జీలు కేవలం రూ.1,996 (328 రోజులకు) అవుతాయి. ఒక నెల రీఛార్జ్ ప్లాన్ రూ.249తో ఏడాదికి కేవలం రూ.2,245 అవుతుంది. ప్రీపెయిడ్ ప్లాన్ల ద్వారా వినియోగదారులు చాలా వరకు ఆదా చేస్తారు. కానీ ఇప్పుడు ఓటీటీ సబ్స్క్రిప్షన్ ఛార్జీలను లెక్కించాల్సి ఉంది.
అమెజాన్ ప్రైమ్ ఏడాది చందా ధర రూ.999, 3 నెలల నెట్ఫ్లిక్స్ చందా రూ.1,500, ప్రతి నెల జీ5 ప్రీమియం చందా రూ.99 విలువైనవి పోస్ట్పెయిడ్ వినియోగదారులకు ఉచితంగా అందుతున్నాయి. ఇవన్నీ కేవలం ఎయిర్టెల్ పోస్ట్పెయిడ్ ప్లాన్ రూ.499తో లభిస్తాయి. వొడాఫోన్ ఐడియాలో రూ.999కన్నా తక్కువ ప్లాన్లలో ఈ సౌకర్యాలు అందుబాటులో లేవు.
ప్రీపెయిడ్ చందాదారులు ఓటీటీ సేవలకు అదనంగా ఖర్చు చేయాల్సి వస్తుంది. కానీ పోస్ట్పెయిడ్ కస్టమర్లకు ఇవి ఉచితంగా అందుతున్నాయి. పోస్ట్పెయిడ్లో ఆడ్-ఆన్ కనెక్షన్ సేవలు అందిస్తోంది. దీని ద్వారా అదనంగా ఆదా చేసే అవకాశం ఉంది. దీనితో పాటు డేటా రోల్ఓవర్ సౌకర్యమూ ఉంది. నెట్ఫ్లిక్స్, అమెజాన్ ప్రైమ్, జీ5లను పట్టించుకోని వారైతే.. ప్రీపెయిడ్ ప్లాన్లు మీకు ఉత్తమం.
ఇదీ చూడండి: 5 కెమెరాలతో షియోమీ నుంచి సూపర్ బడ్జెట్ ఫోన్!
