ఎప్పటికప్పుడు కొత్త అప్డేట్లతో ఆకట్టుకునే సంక్షిప్త సందేశాల దిగ్గజం వాట్సాప్.. వినియోగదారులకు షాకిచ్చింది. విండోస్ ఆపరేటింగ్ సిస్టమ్తో పనిచేసే స్మార్ట్ఫోన్లలో నేటి నుంచి సేవలు నిలిపి వేసింది. ఆండ్రాయిడ్, ఐఓఎస్ ఆపరేటింగ్ సిస్టమ్స్తో పని చేసే కొన్ని స్మార్ట్ఫోన్లకు 2020 ఫిబ్రవరి 1 నుంచి నుంచి సేవలు నిలిపివేస్తున్నట్లు ప్రకటించింది. మరి ఏఏ ఫోన్లలో వాట్సాప్ సేవలు నిలిచిపోయాయో చూద్దాం.
అండ్రాయిడ్ ఫోన్లు..
వెర్షన్ 2.3.7 కన్నా తక్కువ ఓఎస్తో పనిచేస్తున్న అన్ని అండ్రాయిడ్ ఫోన్లకు వాట్సాప్ సేవలు 2020 ఫిబ్రవరి 1 నుంచి ముగియనున్నాయి. ఈ ఓఎస్ ఫోన్లు ఉన్న వినియోగదారులు వాట్సాప్ను ఉపయోగించాలంటే కొత్త మోడళ్లకు అప్గ్రేడ్ అవ్వాల్సి ఉంటుంది.
యాపిల్ ఫోన్లు..
ఐఓఎస్ 8, అంతకన్నా తక్కువ ఓఎస్ వెర్షన్లతో పని చేసే అన్ని యాపిల్ ఫోన్లలోనూ వాట్సాప్ సేవలు నిలిచిపోనున్నాయి. 2020 ఫిబ్రవరి 1 నుంచి ఇది వర్తిస్తుంది.
విండోస్ ఫోన్లు..
విండోస్ ఫోన్లకు ఈ రోజు నుంచి పూర్తిగా సేవలు ఆగిపోయాయి. ఇకపై విండోస్ యూజర్లు వాట్సాప్ వాడాలంటే ఆండ్రాయిడ్కుగానీ, ఐఓఎస్కు గానీ మారక తప్పదు.
నిర్ధరించుకోవడం ఎలా..
మీరు పాత ఫోన్లు వాడుతున్నట్లయితే.. సెట్టింగ్స్లో వాట్సాప్ ప్రకటించిన వెర్షన్లలో మీ ఫోన్ ఉందో లేదో తెలుసుకుంటే సరిపోతుంది. ఒక వేళ మీ ఫోన్ మోడల్ ఆ జాబితాలో ఉంటే మీ వాట్సాప్ డేటా మొత్తం బ్యాకప్ చేసుకోవడం మంచిది.
ఆ మోడల్ ఫోన్లు తక్కువే..
కొన్ని ఫోన్లలో వాట్సాప్ సేవలు నిలిచిపోనున్నా.. పెద్దగా భయపడాల్సిన పనిలేదన్నది టెక్ నిపుణుల మాట. ఎందుకంటే ప్రస్తుతం చాలా మంది కనీసం ప్రతి రెండేళ్లకోసారి ఫోన్ను మారుస్తున్నందున వాటిలో పాత వెర్షన్ ఓఎస్ ఉండే అవకాశం లేదని చెబుతున్నారు. అండ్రాయిడ్, ఐఓఎస్ పాత వెర్షన్ ఫోన్లు వాడే వారి సంఖ్య తక్కువగా ఉంటుందని, వారు మాత్రం కొత్త మోడల్కు అప్గ్రేడయితే సరిపోతుందని అంటున్నారు. విండోస్ ఫోన్ యూజర్లు మాత్రం తప్పని సరిగా అండ్రాయిడ్ గానీ, ఐఓఎస్కుగానీ మారక తప్పదని సూచిస్తున్నారు.
ఇదీ చూడండి:వరుసగా రెండో నెలలోనూ లక్ష కోట్లు దాటిన జీఎస్టీ వసూళ్లు
