'అమెజాన్​ ప్రైమ్ వీడియో' ఇక మరింత శక్తిమంతం

అమెజాన్ సీఈఓ జెఫ్ బెజోస్ బాలీవుడ్ ప్రముఖులతో భేటీ అయ్యారు. షారుఖ్​ఖాన్​, జోయా అక్తర్​లతో మాట్లాడుతూ... భారత్​లో అమెజాన్ ప్రైమ్ వీడియోకు మంచి ఆదరణ లభిస్తోందని ఆనందం వ్యక్తం చేశారు. అందుకే ప్రైమ్​ వీడియోపై తమ పెట్టుబడులు రెట్టింపు చేయాలని నిర్ణయించినట్లు స్పష్టం చేశారు.

'అమెజాన్ ప్రైమ్​ వీడియో'పై తమ పెట్టుబడులు రెట్టింపు చేయనున్నట్లు అమెజాన్ సీఈఓ జెఫ్ బెజోస్​ తెలిపారు. మిగతా దేశాలతో పోల్చితే భారత్​లో తమ కంపెనీ స్ట్రీమింగ్ సర్వీస్​ చాలా మెరుగ్గా పనిచేస్తుండడమే ఇందుకు కారణమని స్పష్టం చేశారు.

భారత్​లో పర్యటిస్తున్న బెజోస్ ముంబయిలో గురువారం రాత్రి​ బాలీవుడ్ ప్రముఖులతో భేటీ అయ్యారు. సూపర్​స్టార్​ షారుఖ్​ఖాన్​, దర్శకుడు జోయా అక్తర్​లతో మాట్లాడుతూ.. తన భారత పర్యటన అనుభవాలను పంచుకున్నారు. పుస్తకాల విక్రయంతో మొదలైన అమెజాన్ ప్రస్థానాన్ని బెజోస్ వివరించారు.

"ప్రైమ్ వీడియో ప్రపంచమంతటా బాగానే ఉంది. జపాన్, జర్మనీ, అమెరికాలో బాగా పనిచేస్తోంది. కానీ మిగతా వాటితో పోల్చితే భారత్​లోనే బాగా మెరుగ్గా ఉంది. వ్యాపారపరంగా చూస్తే ఇది చాలా బాగుంది. అందుకే భారత్​లో ప్రైమ్ వీడియోపై మా పెట్టుబడులు రెట్టింపు చేయాలని నిర్ణయించాం."
- బెజోస్​, అమెజాన్ సీఈఓ

టీవీతో స్వర్ణయుగం

ఈ ప్రపంచం టెలివిజన్ స్వర్ణయుగాన్ని సాక్ష్యంగా ఉందని.. ఇప్పుడు అమెజాన్ 'మోస్ట్​ టాలెంట్ ఫ్రెండ్లీ' స్టూడియోగా ఉండాలని ఆశిస్తున్నానని బెజోస్ అన్నారు. భారతదేశం కూడా తన ప్రణాళికలో భాగంగా ఉందని ఆయన స్పష్టం చేశారు.

అమెజాన్ ప్రైమ్ సభ్యత్వం ఉన్నవారికి తమ ఈ కామర్స్ సేవలు (షిప్పింగ్​) ఉచితంగా అందిస్తున్నామని, ఇది చాలా గొప్ప విషయమని బెజోస్ అభిప్రాయపడ్డారు.

తెగచూస్తున్నారు!

తమ సేవలు ప్రారంభించిన కేవలం రెండేళ్లలోనే భారత వినియోగదారులు... ప్రైమ్ వీడియోను చూస్తున్న గంటలు ఆరు రెట్లు పెరిగాయని బెజోస్ తెలిపారు.
నెట్​ఫ్లిక్స్, హాట్​స్టార్​తో తీవ్రపోటీ ఎదుర్కొంటున్న ప్రైమ్​ వీడియో... మరో ఏడు కొత్త షోలను ఆవిష్కరించింది. త్వరలోనే భారతీయ కంటెంట్​నూ తన స్ట్రీమ్ సర్వీసుకు జోడించనుంది.

ఇదీ చూడండి: 3 దశాబ్దాల కనిష్ఠానికి చైనా వృద్ధి రేటు